X Moneyʼning AQShʼda ishga tushirilishi

Elon Maskning X platformasi Qoʻshma Shtatlarda X Money nomli moliyaviy ilovasini ishga tushirdi. Hozircha bu xizmat faqat pullik obunaga ega foydalanuvchilar uchun mavjud.

Yangi xizmat Elon Maskning X platformasini ijtimoiy tarmoqdan toʻlovlar va boshqa kundalik xizmatlar platformasiga aylantirish rejasining bir qismi hisoblanadi.

X Money foydalanuvchilari Visa debet kartasini olishadi, uni darhol Apple Payʼga qoʻshish mumkin. Shuningdek, X Money foydalanuvchilarga ilova ichida bir-biriga komissiya va limitlarsiz, zudlik bilan mablagʻ oʻtkazish imkonini beradi.

Raqamli kartadan tashqari, foydalanuvchilar jismoniy Visa kartasini ham olishadi. Kompaniya maʼlumotlariga koʻra, X Visa kartasi orqali chet elda toʻlov amalga oshirilganda qoʻshimcha toʻlovlar talab qilinmaydi, hamda dunyoning turli mamlakatlaridagi bankomatlardan naqd pul yechish bepul boʻladi.

X Premium+ obunachilari hisobidagi mablagʻlar boʻyicha yillik 6% foiz olishadi. Premium obunachilar esa xuddi shunday shartlardan faqat maosh yoki boshqa muntazam daromad toʻgʻridan-toʻgʻri X Money hisobiga tushganda foydalanishlari mumkin.

X Money Elon Maskning uzoq yillardan beri shakllangan gʻoyasining bir qismidir. 1999-yilda u X.com nomli moliyaviy kompaniyani asos solgan edi, keyinchalik u PayPal yaratilishiga zamin boʻlgan. Twitterni sotib olganidan soʻng, Mask platformani X deb oʻzgartirdi va bir necha bor oʻz maqsadi foydalanuvchilarni bir-biri bilan bogʻlaydigan, toʻlov funksiyasini taʼminlaydigan va boshqa kundalik xizmatlarni taklif qiladigan yagona ilova yaratish ekanligini taʼkidlagan. X Money esa aynan shu reja yoʻlidagi birinchi jiddiy qadamdir.

Manba: Investing.com