Citi yarimoʻtkazgichlar sektoridan uchta sevimli kompaniyani nomladi

Yarimoʻtkazgichlar sektorida kuzatilgan soʻnggi pasayishga qaramay, investitsiya banki Citi sanoat boʻyicha optimistik qarashini saqlab qolmoqda. Bankning bahosiga koʻra, bu koʻproq vaqtinchalik pasayish boʻlib, sektorga boʻlgan qiziqish yuqoriligicha qolmoqda.

Broadcom, Texas Instruments va Applied Materials Citi tomonidan eng sara kompaniyalar sifatida nomlangan. Tahlilchilarning baholashlariga koʻra, sektor kompaniyalarining 2027-yilga moʻljallangan foyda prognozlari oʻrtacha 11-12 foizga oshirilgan.

Bozorda taʼminot bilan bogʻliq boʻlishi mumkin boʻlgan muammolar haqida muhokamalar kuchaymoqda. Asosiy xavf ayrim komponentlar hamda DRAM xotirasi tanqisligi bilan bogʻliq boʻlib, bu 2027-yilda alohida dolzarblik kasb etishi mumkin. Shunga qaramay, yarimoʻtkazgichlarga boʻlgan talab yuqori darajada saqlanmoqda.

Oʻsishning asosiy manbai sunʼiy intellekt infratuzilmasiga boʻlgan talabning ortishi bilan rivojlanayotgan maʼlumotlar markazlaridir. Citining bahosiga koʻra, sektordagi umumiy talabning taxminan uchdan bir qismi aynan shu segmentga toʻgʻri keladi.

Boshqa tomondan, shaxsiy kompyuterlar va mobil telefonlar bozorida nisbatan zaif natijalar kuzatilmoqda. Tahlilchilar buni isteʼmolchilar xarajatlarining qisqarishi va taʼminot bilan bogʻliq qiyinchiliklar bilan izohlashmoqda. Shu bilan birga, avtomobilsozlik va sanoat texnologiyalari sektorlari barqaror oʻsishni davom ettirmoqda.

Citi hisob-kitoblariga koʻra, qisqa muddatli tebranishlarga qaramay, yarimoʻtkazgichlar sektorida oʻsish salohiyati saqlanib qolmoqda.

Manba: Investing.com