Nike Xitoyda savdo strategiyasini oʻzgartirmoqda

Nike Xitoydagi sotuvlarni hamkor kompaniyalar orqali qisqartirmoqda. Kompaniyaning maqsadi — tez-tez oʻtkaziladigan chegirmalarni cheklash, brend pozitsiyasini mustahkamlash va sotuvlardan olinadigan foydani oshirish. Ushbu oʻzgarishlar tufayli Nike taxminan 1 milliard dollar daromad yoʻqotishi mumkin.

Bernstein tahlilchilarining hisob-kitoblariga koʻra, Nikeʼning Xitoydagi operatsion foyda marjasi 2027 moliyaviy yili uchun 24 foizgacha oʻsadi. 2027-yil yanvaridan boshlab Nike mahsulotlari onlayn tarzda faqat kompaniyaning rasmiy veb-sayti, ilovasi hamda Tmall, JD.com va Douyinʼdagi rasmiy doʻkonlarida sotiladi.

Kompaniya mahsulotlarni isteʼmolchilarga sezilarli chegirmalar bilan taklif qilgan onlayn chakana sotuvchilar bilan hamkorlikni toʻxtatmoqda. Nikeʼning fikricha, bu amaliyot brend imijiga zarar yetkazgan va ruxsatsiz sotuvlarning oʻsishiga sabab boʻlgan.

Tahlilchilarning soʻzlariga koʻra, yangi model foydani oshiradi, biroq yoʻqotilgan sotuvlarni toʻliq tiklash qiyin boʻladi. Past narxlarga eʼtibor qaratgan baʼzi isteʼmolchilar Adidas yoki mahalliy brendlar — Anta va Li Ningʻga murojaat qilishi mumkin.

Nikeʼning Xitoy bozoridagi ulushi 2020-yildan beri 27 foizdan 16 foizga tushib ketdi. Bernsteinʼning hisob-kitoblariga koʻra, kompaniyaning pozitsiyasi 2028-yildan boshlab asta-sekin mustahkamlanadi.

Manba: Investing.com