OpenAI rahbari Sem Altman Avstraliya parlamenti tinglovida qatnashmaydi

OpenAI kompaniyasining bosh direktori Sam Altman Avstraliya Senatining sunʼiy intellekt masalalari boʻyicha tergov doirasida rejalashtirilgan tinglovda ishtirok etmaydi. Kompaniya bayonotiga koʻra, 6-oktabrda Sidneyda oʻtkaziladigan sessiyada Altman oʻrniga OpenAI-ning bosh strategiya boʻyicha rahbari Jeyson Kvon ishtirok etadi.

Kvon AQShdan Avstraliyaga safar qilib, sunʼiy intellekt masalalari boʻyicha ishlayotgan qoʻshma parlament qoʻmitasining savollariga javob beradi. Kompaniya vakilining soʻzlariga koʻra, OpenAI tergov doirasida qoʻmitaga rasmiy javobni allaqachon taqdim etgan.

Avstraliya hukumati yakshanba kuni OpenAI va sunʼiy intellekt kompaniyasi Anthropic rahbarlaridan tinglovda ishtirok etishni soʻragan edi. Bu qaror Avstraliya Bosh vaziri Entoni Albanezening Nyu-Yorkdagi BMT sammitida qilgan bayonotidan soʻng qabul qilindi, u yerda u Avstraliya hukumati veb-saytiga aloqador kiberhodisa haqida maʼlumot oshkor qilgan edi.

Albaneze bu hodisada OpenAI-ning sunʼiy intellekt modeli ishtirok etganini aytib, kompaniyani Avstraliya hukumatiga maʼlumot yetkazishni kechiktirganlikda tanqid qildi. BMT sammitida u shuningdek sunʼiy intellektni ishlab chiqish va undan foydalanish ustidan qattiqroq nazorat oʻrnatish zarurligi haqida ham gapirdi.

Keyinroq OpenAI kompaniyasi oʻz sunʼiy intellekt modellari AQSh hukumati veb-saytlaridagi, jumladan AQSh Aholini roʻyxatga olish byurosi va Qimmatli qogʻozlar va birjalar komissiyasi (SEC) veb-saytlaridagi ommaviy foydalanish uchun ochiq maʼlumotlarga kirganini maʼlum qildi.

Avstraliya parlamentining soʻrovi Anthropic kompaniyasining bosh direktori Dario Amodeyga ham tegishli boʻlgan. Kompaniya Amodeyning tinglovda ishtirok etishini hali tasdiqlamagan. U ilgari bir necha bor sunʼiy intellektni rivojlantirish surʼati xavfsizlik choralarining texnologik taraqqiyotga hamqadam boʻlishiga imkon berishi zarurligi haqida gapirgan edi.

OpenAI bayonotiga koʻra, kompaniya qoʻmita faoliyatini kuzatib bormoqda va qoʻshimcha sessiyalar belgilansa, kelgusi tinglovlarda ishtirok etishga tayyor.