OpenAI yangi kiberxavfsizlik vositalarini taqdim etdi

OpenAI oʻzining Daybreak tashabbusini — kodni avtomatik tarzda tekshirish va zaifliklarni tezkor bartaraf etishga qaratilgan yirik kiberxavfsizlik loyihasini kengaytirdi. Loyiha doirasida yangilangan Codex Security plagini dasturchilarga kodni chuqur tahlil qilish, potensial hujum vektorlarini aniqlash hamda zaifliklarni bartaraf etuvchi tuzatilgan versiyalarni yaratish imkonini beradi.

Eʼtiborlisi shundaki, sinov bosqichida ushbu vosita allaqachon 30 milliondan ortiq kod oʻzgarishini qayta ishlagan va yarim milliondan ortiq muammoni avtomatik ravishda hal qilgan.

Kompaniya shuningdek, kiberxavfsizlik vazifalarini bajarish uchun bugungi kungacha yaratilgan eng kuchli sunʼiy intellekt boʻlgan maxsus GPT-5.5-Cyber modelini ham taqdim etdi. Xavfsizlik nuqtai nazaridan, undan foydalanish tegishli vakolatga ega mutaxassislar bilan cheklangan.

Kompaniya IBM, Cisco, Accenture va Palo Alto Networks bilan hamkorlik qilmoqda. Alohida Patch the Planet dasturi esa Python, Go va cURL kabi mashhur ochiq manbali dasturiy taʼminotlarni mustahkamlashga qaratilgan. Ushbu yoʻnalishda OpenAI texnologiya kompaniyalari, YeI institutlari va bir qancha davlatlar hukumatlari bilan hamkorlik qilmoqda.

Manba: Investing.com