Palantir aksiyalari oʻsdi — AQSh agentligi harbiy razvedka tizimi uchun tenderni bekor qildi

Palantir Technologies aksiyalari juma kuni savdolar boshlanishidan oldingi sessiyada taxminan 1 foizga oshdi. Bunga sabab Bloombergʻning AQSh Harbiy razvedka agentligi (DIA) oʻzining harbiy razvedka tizimini yangilash boʻyicha tenderni bekor qilgani haqidagi xabari boʻldi.

Agentlik vakilining bayonotiga koʻra, tenderni bekor qilish qarori DIAʼning oʻz iltimosiga koʻra qabul qilingan. Ushbu tizim dunyoning turli mintaqalaridagi harbiy operatsiyalarni, jumladan, nishonlarni aniqlashni qoʻllab-quvvatlash uchun ishlatiladi.

Bloomberg maʼlumotlariga koʻra, Palantir shu yilning may oyida rasmiy protest bildirgan edi. Kompaniya hukumat oʻxshash maqsad va funksiyaga ega tijorat mahsulotlari Palantirʼda allaqachon mavjud boʻlishiga qaramay, yangi razvedka platformasini noldan yaratishga urinayotganini taʼkidlagan edi.

Tenderning bekor qilinishi Harbiy razvedka agentligining sunʼiy intellektga asoslangan harbiy razvedka tizimini modernizatsiya qilish rejalarini murakkablashtiradi.

Tahlilchilarning baholashicha, ushbu qaror Palantir uchun vaqtinchalik gʻalaba hisoblanadi. Kompaniya soʻnggi vaqtda AQSh mudofaa idoralari bilan hamkorligini sezilarli darajada kengaytirgan boʻlib, Trampning ikkinchi maʼmuriyati davrida uning bozor qiymati va harbiy shartnomalar hajmi ancha oshdi.