Germaniya reguliatorining qarori asosida Apple nemis ilovalaridan maʼlumotlardan foydalanish qoidalarini oʻzgartirdi

Apple iPhone va iPadʼdagi ilovalar foydalanuvchilarning shaxsiy maʼlumotlaridan maqsadli reklama uchun qanday foydalanishi boʻyicha qoidalarni oʻzgartiradi. Bu qaror dushanba kuni Germaniyaning Federal kartel idorasi tomonidan eʼlon qilindi va Appleʼga qarshi yillar davom etgan tergovga yakun yasadi.

Germaniya regulyatori Appleʼning App Tracking Transparency (ATT) tizimi foydalanuvchi roziligini olishda kompaniyaning oʻz ilovalariga uchinchi tomon ishlab chiquvchilarga nisbatan qulayroq shart-sharoitlar yaratganini aniqladi, bu esa raqobat qoidalarining potentsial buzilishi sifatida baholandi.

Appleʼga qarorning rasmiy yetkazilishidan boshlab oʻzgarishlarni amalga oshirish uchun toʻrt oy muddat beriladi. Yangi majburiyatlar yetti yil davomida kuchda boʻladi va mustaqil tayinlangan shaxs tomonidan nazorat qilinadi.

Yangi qoidalarga koʻra, uchinchi tomon ilovalaridagi rozilik soʻrash oynalari oʻzgartirilishi kerak. Ularda foydalanuvchini roziligini rad etishdan chalgʻitadigan yoki bunga toʻsqinlik qiladigan matn va belgilar boʻlmasligi kerak. Rozilik oynalari vizual va lisoniy jihatdan neytral boʻlishi lozim.

Uchinchi tomon ilova ishlab chiquvchilariga, shuningdek, Apple talab qiladigan rozilik jarayonini oʻzlarining maʼlumotlarni himoya qilish boʻyicha rozilik soʻrovlari bilan birlashtirishda koʻproq moslashuvchanlik beriladi.

Appleʼning maʼlumotlariga koʻra, oʻzgarishlar Yevropa Ittifoqining deyarli barcha mamlakatlariga tatbiq etiladi. Kompaniya, shuningdek, regulyator talablariga muvofiq rozilik oynasining matni va dizaynini allaqachon oʻzgartirganini taʼkidladi.

Uchinchi tomon ilova ishlab chiquvchilari, jumladan Meta Platforms uchun foydalanuvchi maʼlumotlariga aniq kirish imkoniyati alohida ahamiyatga ega, chunki maqsadli reklama odatda keng auditoriya uchun moʻljallangan reklama kampaniyalariga nisbatan koʻproq daromad keltiradi.

Appleʼning ATT tizimi ilgari ham Yevropa regulyatorlarining diqqat markazida boʻlgan. Fransiya Appleʼga 150 million yevro, Italiya esa ATT qoidalari bilan bogʻliq holda 98,6 million yevro jarima solgan edi.