5G-ის ახალი ქსელების ფონზე აშშ ავიაციის უსაფრთხოების წესებს ამკაცრებს

აშშ-ის ფედერალურმა საავიაციო ადმინისტრაციამ (FAA) საბოლოო გადაწყვეტილება მიიღო, რომლის მიხედვითაც, 2027 წლამდე ყველა საჰაერო ხომალდი, რომელიც აშშ-ის საჰაერო სივრცეში ოპერირებს, ახალი თაობის რადიოალტიმეტრებით უნდა აღიჭურვოს.

რადიოალტიმეტრი თვითმფრინავის ერთ-ერთი ყველაზე მნიშვნელოვანი უსაფრთხოების სისტემაა, რომელიც ზუსტად განსაზღვრავს მის სიმაღლეს მიწის ზედაპირიდან. ეს მოწყობილობა განსაკუთრებით მნიშვნელოვანია ცუდი ხილვადობის პირობებში, როდესაც პილოტები აფრენისა და დაშვებისას სწორედ მის მონაცემებს ეყრდნობიან. FAA მიიჩნევს, რომ არსებული მოწყობილობების ნაწილი 5G სიგნალების შესაძლო ჩარევისგან საკმარისად დაცული არ არის, რის გამოც მათი განახლება აუცილებელი გახდა.

FAA-ის რეგულაცია ასევე ზღუდავს 5G გადამცემების სიმძლავრეს და განსაზღვრავს ანძების სიმაღლის ლიმიტებს, რათა ავიაციისთვის დამატებითი რისკები არ შეიქმნას. იმ ავიაკომპანიებს, რომლებსაც ახალი აღჭურვილობის შეძენა მოუწევთ, სახელმწიფო სპეციალური კომპენსაციის პროგრამითაც დაეხმარება.

FAA-ის შეფასებით, თვითმფრინავების ახალი ალტიმეტრებით აღჭურვის სრული ღირებულება დაახლოებით 4.49 მილიარდ დოლარს შეადგენს, თუმცა სააგენტოს განცხადებით, კომპენსაციის პროგრამა ავიაკომპანიებს საშუალებას მისცემს, ახალი ტექნოლოგიების დანერგვა რამდენიმე წლით უფრო ადრე დაასრულონ, ვიდრე ეს დამატებითი ფინანსური მხარდაჭერის გარეშე იქნებოდა შესაძლებელი.

წყარო: Investing.com