Airbus-ის აქციები 7%-ით გაიზარდა – კომპანიამ €5 მილიარდიანი აქციების გამოსყიდვის პროგრამა წარადგინა

Airbus SE-ის აქციები ოთხშაბათს 7%-ით გაიზარდა, მას შემდეგ რაც კომპანიამ სამი წლის განმავლობაში 5 მილიარდი ევროს მოცულობის აქციების გამოსყიდვის (share buyback) პროგრამა დააანონსა და 2029 წლისთვის ოპერაციული მოგების (Adjusted EBIT) ახალი სამიზნე განსაზღვრა.

ლონდონში გამართულ Business Update-ზე Airbus-ის აღმასრულებელმა დირექტორმა გიიომ ფორიმ და კომპანიის მენეჯმენტმა ინვესტორებს წარუდგინეს სამომავლო სტრატეგია და განახლებული ფინანსური პროგნოზები, ასევე მიმოიხილეს კომერციული ავიაციის, ვერტმფრენებისა და თავდაცვისა და კოსმოსის მიმართულებების განვითარების გეგმები.

კომპანიის დირექტორთა საბჭომ დაამტკიცა 5 მილიარდი ევროს ღირებულების აქციების გამოსყიდვის პროგრამა, რომელიც მომდევნო სამი წლის განმავლობაში განხორციელდება, აქციონერთა თანხმობის პირობებში.

Airbus-მა ასევე განაცხადა, რომ 2029 წლისთვის Adjusted EBIT-ის მოცულობას 12–13 მილიარდ ევრომდე ზრდას ელოდება. პროგნოზი ეფუძნება ევროსა და აშშ დოლარის 1.22-იან გაცვლით კურსს. კომპანიამ ამასთან უცვლელად დატოვა 2026 წლის ფინანსური პროგნოზი და დაადასტურა, რომ ხუთწლიან პერიოდში თავისუფალი ფულადი ნაკადების (Free Cash Flow) კონვერტაციის კოეფიციენტი დაახლოებით 1-ის დონეზე შენარჩუნდება.

გიიომ ფორის განცხადებით, Airbus-ის მთავარი მიზანია მზარდი მოთხოვნის დაკმაყოფილება როგორც სამოქალაქო, ისე სამხედრო ავიაციის მიმართულებით და ამავდროულად მდგრადი ზრდის უზრუნველყოფა.

კომპანიამ აღნიშნა, რომ პროგნოზი ეფუძნება ვარაუდს, რომ გლობალურ ვაჭრობაში, ეკონომიკაში, მიწოდების ჯაჭვებში, საჰაერო ტრანსპორტსა და ტარიფების პოლიტიკაში დამატებითი ნეგატიური ცვლილებები არ მოხდება. ასევე, გათვლებში არ არის ასახული შესაძლო შერწყმებისა და შესყიდვების გავლენა.

Morgan Stanley-ში Airbus-ის განახლებული პროგნოზი მოსალოდნელზე უფრო პოზიტიურად შეაფასეს. საინვესტიციო ბანკის ანალიტიკოსების შეფასებით, ყველაზე დიდი სიურპრიზი სწორედ 5 მილიარდი ევროს აქციების გამოსყიდვის პროგრამა იყო, რომელიც კომპანიის საბაზრო კაპიტალიზაციის დაახლოებით 1%-ს წელიწადში შეადგენს.

Morgan Stanley-ის პროგნოზით, დივიდენდებთან ერთად Airbus მომდევნო სამი წლის განმავლობაში აქციონერებს თავისუფალი ფულადი ნაკადების დაახლოებით 60%-ს დაუბრუნებს.

ამასთან, კომპანიის პრეზენტაციაში დაზუსტდა, რომ A320 თვითმფრინავების წარმოების ტემპი 2027 წელს თვეში 70-75 ერთეულამდე გაიზრდება, თუმცა შემდგომ პერიოდში თვეში 75 თვითმფრინავის მუდმივი წარმოების შესახებ ადრე გაცხადებული მიზანი აღარ ყოფილა ნახსენები.