Alaska LNG-ის პროექტი საკანონმდებლო შეფერხების გამო გაჭიანურდა

ალასკის გუბერნატორმა მაიკ დანლივიმ გააკრიტიკა კანონმდებლების გადაწყვეტილება, რომლებმაც Alaska LNG-ის პროექტისთვის საჭირო საგადასახადო ცვლილება კენჭისყრაზე არ გაიტანეს. მისი შეფასებით, ამან შესაძლოა ინვესტორებისა და პოტენციური პარტნიორების ნდობაზე უარყოფითად იმოქმედოს.

საუბარია დაახლოებით 50 მილიარდი დოლარის ღირებულების პროექტზე, რომელიც გაზსადენისა და თხევადი ბუნებრივი აირის საექსპორტო ტერმინალის მშენებლობას ითვალისწინებს. პროექტი აზიის ბაზრისთვის გაზის მიწოდებასთან ერთად, ალასკის შიდა მოთხოვნის დაკმაყოფილებასაც ემსახურება.

დანლივი კანონმდებლებს 20 აგვისტოს შეკრებისა და საკითხის ხელახლა განხილვისკენ მოუწოდებს. დანლივის თქმით, ალასკაში ხელმისაწვდომი ბუნებრივი აირის მიწოდების პრობლემა წლებია არსებობს, ხოლო პროექტის კიდევ უფრო გაჭიანურება ხარჯებს გაზრდის.

Alaska LNG-ს მხარს ტრამპის ადმინისტრაციაც უჭერს. პროექტით განსაკუთრებით იაპონიაა დაინტერესებული. JERA-მ და Tokyo Gas-მა წინასწარი შეთანხმებები გააფორმეს და წელიწადში ჯამურად 2 მილიონი ტონა LNG-ის შეძენას გეგმავენ.

პროექტის დაწყებამდე Glenfarne-ს მყიდველებთან დამატებითი ხელშეკრულებების გაფორმება სჭირდება. კომპანიის მიზანია, წინასწარ გაყიდოს დაგეგმილი წლიური 20 მილიონი ტონა LNG-ის 80%, რაც პროექტის დაფინანსებისთვის აუცილებელია.

წყარო: Investing.com