Alphabet-ის აქციები დაეცა Gemini 3.5 Pro-ს გამოშვების დაგვიანების შემდეგ
Alphabet-ის აქციები ხუთშაბათს 2.3%-ით დაეცა მას შემდეგ, რაც Bloomberg-მა გაავრცელა ინფორმაცია, რომ Google-ის ყველაზე ძლიერი ხელოვნური ინტელექტის მოდელის, Gemini 3.5 Pro-ს, გამოშვება დაგეგმილ ვადაზე რამდენიმე თვით გვიან მოხდება.
გამოცემის ინფორმაციით, შეფერხების მიზეზი მოდელის შესაძლებლობების, განსაკუთრებით პროგრამირების (coding) მიმართულებით, დამატებითი გაუმჯობესებაა. წყაროების ცნობით, ამან Google-ის ინჟინრებსა და AI მკვლევრებში უკმაყოფილება გამოიწვია, რადგან ისინი შიშობენ, რომ კომპანია კონკურენტებთან პოზიციებს კარგავს.
ბოლო პერიოდში OpenAI-მ და Meta-მ ახალი AI მოდელები წარადგინეს, რომლებიც პროგრამირების მიმართულებით Google-ის ამჟამინდელ სისტემებს აღემატება. Bloomberg-ის ცნობით, Google-მა გასულ თვეს Gemini-ის სასწავლო მონაცემებიც განაახლა, თუმცა მიღებული შედეგები მოლოდინს ვერ ამართლებს.
Google-ის წარმომადგენლის განცხადებით, კომპანია აქტიურად აგრძელებს სხვადასხვა AI მოდელის განვითარებას და ამავდროულად ცდილობს მათი გამოყენება მომხმარებლებისთვის ეკონომიკურად ხელმისაწვდომი იყოს.
მისივე თქმით, Gemini 3.5 Pro, განახლებული Flash მოდელი და სხვა AI სისტემები ამჟამად პარტნიორებთან ერთად ტესტირების ეტაპზეა. კომპანია ასევე თანამშრომლობს აშშ-ის მთავრობასთან AI მოდელების უსაფრთხოების ტესტირებისა და რეგულირების მიმართულებით.
Bloomberg აღნიშნავს, რომ Google-ის მასშტაბური ორგანიზაციული სტრუქტურა და AI ტექნოლოგიების ინტეგრაცია ისეთ პროდუქტებში, როგორიცაა Search, Maps და YouTube, ახალი მოდელების გამოშვების პროცესს ხშირად აჭიანურებს.
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
