Amazon-ის წინააღმდეგ აშშ-ში ახალი სარჩელი შეიტანეს
აშშ-ის ფედერალურმა სავაჭრო კომისიამ (FTC) Amazon-ის წინააღმდეგ სასამართლოში სარჩელი შეიტანა. საქმეს 20-ზე მეტი შტატიც შეუერთდა.
Amazon-ს საკუთარ სავაჭრო პლატფორმაზე რეკლამის ფასებით მანიპულირებას ედავებიან. ბრალდების მიხედვით, კომპანია რეკლამის განთავსებისთვის საჭირო მინიმალურ ფასს ფარულად ზრდიდა და ამის შესახებ რეკლამის დამკვეთებს სათანადო ინფორმაციას არ აწვდიდა.
შედეგად, კომპანიებს Amazon-ზე საკუთარი პროდუქციის რეკლამირებისთვის უფრო მეტის გადახდა უწევდათ. საუბარია მილიარდობით დოლარის შესაძლო ზარალზე. საქმეში ჩართულმა შტატებმა შესაძლოა Amazon-ისგან ჯარიმებისა და თანხის ნაწილის დაბრუნებაც მოითხოვონ.
ეს FTC-სა და Amazon-ს შორის პირველი დავა არ არის. გასული წლის სექტემბერში კომპანიამ Prime-ის გამოწერებთან დაკავშირებული საქმის მოსაგვარებლად 2.5 მილიარდი დოლარის გადახდაზე თანხმობა განაცხადა. მაშინ Amazon-ს მომხმარებლების შეცდომაში შეყვანას ედავებოდნენ.
ახალი სარჩელის გავრცელების შემდეგ Amazon-ის აქციები დაახლოებით 3%-ით შემცირდა.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
