Amazon-მა 25 მილიარდი დოლარის ობლიგაციები გაყიდა

Amazon-მა ხელოვნური ინტელექტის მიმართულებით დაგეგმილი პროექტების დასაფინანსებლად 25 მილიარდი დოლარი მოიზიდა. კომპანია მიღებულ თანხას ხელოვნური ინტელექტის ინფრასტრუქტურის განვითარებას მოახმარს.

ფინანსური რესურსის მოსაზიდად Amazon-მა საინვესტიციო კლასის ობლიგაციები გამოუშვა. ინვესტორების მოთხოვნამ 62 მილიარდ დოლარს მიაღწია, თუმცა ეს მარტში დაფიქსირებულ მაჩვენებელზე დაბალია, როდესაც მოთხოვნა თითქმის ორჯერ მეტი იყო.

ეს Amazon-ისთვის ბოლო პერიოდის ერთ-ერთი ყველაზე მსხვილი დაფინანსებაა. კომპანიის მიერ ბოლო ერთი წლის განმავლობაში მოზიდულმა ვალმა უკვე 100 მილიარდ დოლარს გადააჭარბა. ეს თანხა 2026 წლისთვის დაგეგმილი 200 მილიარდი დოლარის საინვესტიციო პროგრამის ნაწილია. ობლიგაციები რვა სხვადასხვა ვადით გაიყიდა, მათი დაფარვის პერიოდი კი 3-დან 40 წლამდე მერყეობს. მაღალი საკრედიტო რეიტინგის გამო კომპანიამ დაფინანსება მოსალოდნელზე უკეთესი პირობებით მოიზიდა.

ანალიტიკოსების შეფასებით, ამ გარიგების შემდეგ ხელოვნურ ინტელექტთან დაკავშირებული ვალის საერთო მოცულობამ მსოფლიოში წელს 335 მილიარდ დოლარს მიაღწია. Amazon-ში აცხადებენ, რომ 2026 წლის ბოლომდე დამატებითი ვალის აღებას აღარ გეგმავენ.

წყარო: Investing.com