აშშ და რუსეთი Nord Stream-ით გაზის მიწოდების აღდგენას განიხილავენ

აშშ-ისა და რუსეთის მაღალი რანგის ოფიციალური პირები განიხილავდნენ, შესაძლებელი იყო თუ არა უკრაინაში ომის დასრულების შემდეგ Nord Stream-ის მილსადენებით ევროპისთვის რუსული გაზის მიწოდების აღდგენა. Reuters-ის წყაროების ინფორმაციით, ამ საკითხზე მოლაპარაკებებში ვლადიმირ პუტინის მრჩეველი კირილ დმიტრიევი და დონალდ ტრამპის სიძე ჯარედ კუშნერი მონაწილეობდნენ.

ერთ-ერთი ვარიანტით, მილსადენების საქმიანობაში ამერიკელი ინვესტორი ჩაერთვებოდა და ევროპაში ენერგორესურსების გაყიდვით შემოსავალს მიიღებდა. თეთრი სახლის წარმომადგენელმა განაცხადა, რომ ნებისმიერი მსგავსი გარიგება აშშ-ის კომპანიებისა და გადასახადის გადამხდელებისთვის სასარგებლო უნდა იყოს. მანვე უარყო, რომ Nord Stream-ზე ბოლო პერიოდში მოლაპარაკებები გაიმართა.

გეგმის განხორციელება ახლო მომავალში ნაკლებად რეალურია. მილსადენები ამერიკული და ევროპული სანქციების ქვეშაა, გერმანიის მთავრობა კი მათ აღდგენას ეწინააღმდეგება. ომამდე გერმანია ბუნებრივი აირის ნახევარზე მეტს რუსეთიდან იღებდა. Nord Stream-ის საკონტროლო წილი Gazprom-ს ეკუთვნის, დანარჩენ აქციონერებს შორის კი გერმანული, ფრანგული და ნიდერლანდური კომპანიები არიან.

წყარო: Reuters