აშშ-ის ახალი ტარიფები ინდოეთის ექსპორტის თითქმის ნახევარს არ შეეხება

ინდოეთის მთავრობის განცხადებით, ქვეყნის ექსპორტის დაახლოებით 45%-ზე აშშ-ის მიერ დაწესებული ახალი დამატებითი ტარიფები არ გავრცელდება. ხელისუფლების შეფასებით, აღნიშნული ორ ქვეყანას შორის გამართული სავაჭრო მოლაპარაკებების შედეგია.

ინდოეთის ვაჭრობისა და მრეწველობის სამინისტროს ინფორმაციით, დამატებითი 10%-იანი ტარიფი არ შეეხება გენერიკულ მედიკამენტებს, სმარტფონებს, ფოლადს, ალუმინსა და ავტონაწილებს. სამინისტროს შეფასებით, ეს ინდოელი ექსპორტიორებისთვის ხელსაყრელი იქნება, ვინაიდან სხვა ქვეყნებთან შედარებით ამერიკულ ბაზარზე ნაკლები დამატებითი ხარჯის გაწევა მოუწევთ.

მეორე მხრივ, ინდოეთის ექსპორტის დარჩენილ 55%-ზე ახალი, 10%-იანი ტარიფი დაწესდება, თუმცა ინდოეთის მთავრობა აღნიშნავს, რომ ქვეყნისთვის მოქმედი ტარიფები კვლავაც უფრო დაბალია, ვიდრე იმ სახელმწიფოების უმეტესობისთვის, რომლებზეც აშშ-ის ახალი სავაჭრო პოლიტიკა ვრცელდება.

ინდოეთსა და აშშ-ს შორის ორმხრივი სავაჭრო შეთანხმების შესახებ მოლაპარაკებები გასული წლიდან მიმდინარეობს. ნიუ-დელი აცხადებს, რომ მხარეები მუშაობას აგრძელებენ, რათა შეთანხმება უახლოეს პერიოდში დასრულდეს.

ინდოეთში კვლავ განიხილავენ აშშ-ის მხრიდან გენერიკულ მედიკამენტებზე დამატებითი ტარიფების შესაძლო დაწესებას. ამერიკის შეერთებული შტატები ინდური ფარმაცევტული პროდუქციის უმსხვილესი საექსპორტო ბაზარია, ამიტომ ამ მიმართულებით ნებისმიერი ცვლილება ქვეყნის ფარმაცევტულ ინდუსტრიაზე მნიშვნელოვან გავლენას მოახდენს.

წყარო: Investing.com