აშშ-ის იუსტიციის დეპარტამენტი New York Times-ის ჟურნალისტებისგან წყაროების გამჟღავნებას აღარ მოითხოვს

აშშ-ის იუსტიციის დეპარტამენტი უკან გაიწვევს მოთხოვნას, რომლის მიხედვითაც, New York Times-ის ჟურნალისტებს ანონიმური წყაროების ვინაობა უნდა გაემჟღავნებინათ.

საქმე ეხება გამოცემის სტატიებს, რომლებშიც დონალდ ტრამპისთვის კატარის მიერ გადაცემული თვითმფრინავის უსაფრთხოებასთან დაკავშირებულ პრობლემებზე იყო საუბარი. New York Times-ის ინფორმაციით, ტრამპმა თურქეთი ძველი Air Force One-ით დატოვა, რადგან კატარისგან მიღებულ ახალ თვითმფრინავს ანტისარაკეტო და სხვა თავდაცვითი სისტემები არ ჰქონდა. მასალაში აღნიშნული ინფორმაცია ანონიმურ წყაროებს ეყრდნობოდა.

ამის შემდეგ მანჰეტენის ფედერალურმა პროკურორმა ჯეი კლეიტონმა 10 ივლისს ჟურნალისტებისგან წყაროების შესახებ ინფორმაცია მოითხოვა, თუმცა სასამართლო სხდომაზე პროკურორმა განაცხადა, რომ იუსტიციის დეპარტამენტი ამ მოთხოვნას უკან გაიწვევს.

New York Times-მა სასამართლოს მიმართა და განაცხადა, რომ მსგავსი ნაბიჯი ჟურნალისტების დაშინებასა და მათ საქმიანობაში ჩარევას ემსახურებოდა. გამოცემის შეფასებით, ეს არღვევდა აშშ-ის კონსტიტუციით დაცულ პრესის თავისუფლებას. კომპანიამ ასევე აღნიშნა, რომ იუსტიციის დეპარტამენტმა საკუთარ შიდა წესებსაც გადაუხვია, რადგან ჟურნალისტებისგან წყაროების გამჟღავნების მოთხოვნა მხოლოდ გამონაკლის შემთხვევებში უნდა გამოიყენებოდეს.

პროკურატურა ამ ბრალდებებს არ დაეთანხმა. უწყების პოზიციით, პრესის თავისუფლება ჟურნალისტებს სისხლის სამართლის გამოძიებისთვის მნიშვნელოვანი ინფორმაციის დამალვის უფლებას არ აძლევს. იუსტიციის დეპარტამენტში ასევე განაცხადეს, რომ New York Times-ის მიერ გამოქვეყნებული მასალა ეროვნული უსაფრთხოების საკითხებს შეეხებოდა, რადგან ინფორმაცია პრეზიდენტის ფრენას და საიდუმლო თავდაცვით მონაცემებს უკავშირდებოდა.

ტრამპის ადმინისტრაცია აცხადებს, რომ მისი მიზანი ჟურნალისტებზე ზეწოლა კი არა, საიდუმლო ინფორმაციის გამავრცელებლების წინააღმდეგ სისხლის სამართლის საქმეების წარმოებაა. მედიის უფლებების დამცველი ორგანიზაციები კი მიიჩნევენ, რომ ადმინისტრაცია ჟურნალისტების წინააღმდეგ სამართლებრივ მექანიზმებს ზედმეტად ხშირად იყენებს.

წყარო: Investing.com