აშშ-ის სენატმა კრიპტოვალუტების რეგულირების კანონპროექტის განახლებული ვერსია გამოაქვეყნა

აშშ-ის სენატში კრიპტოვალუტების ბაზრის რეგულირების შესახებ კანონპროექტის – Clarity Act-ის განახლებული ტექსტი გამოქვეყნდა. დოკუმენტი ადგენს, როგორ უნდა დარეგულირდეს ციფრული აქტივების ბაზარი და რომელი უწყება იქნება პასუხისმგებელი მის ზედამხედველობაზე.

კანონპროექტის მიხედვით, 2029 წლის იანვრამდე პრეზიდენტს, ვიცე-პრეზიდენტსა და კონგრესის გარკვეულ წევრებს საკუთარი კრიპტოვალუტის გამოშვება ან მისი მხარდაჭერა აეკრძალებათ. ეს ჩანაწერი პოლიტიკოსების მხრიდან კრიპტოაქტივებით შესაძლო ფინანსური სარგებლის მიღების შეზღუდვას ისახავს მიზნად.

დოკუმენტი ასევე ცვლის წესებს სტეიბლკოინებთან დაკავშირებით. კომპანიებს აღარ ექნებათ უფლება, მომხმარებლებს მხოლოდ კრიპტოვალუტის ანგარიშზე შენახვისთვის სარგებელი გადაუხადონ, თუმცა წახალისება შესაძლებელი იქნება იმ შემთხვევაში, თუ სტეიბლკოინი გადახდებისთვის გამოიყენება.

კანონპროექტი კრიპტობირჟებს, ბროკერებსა და დილერებს ფულის გათეთრების წინააღმდეგ მოქმედი იმავე წესების დაცვას ავალდებულებს, რომლებიც ბანკებისთვის არის დაწესებული. მათ მომხმარებლების იდენტიფიცირება და საეჭვო ოპერაციების მონიტორინგი მოუწევთ.

Clarity Act-ი ასევე ამარტივებს კრიპტოკომპანიებისთვის კაპიტალის მოზიდვის წესებს. მათ გარკვეული ლიმიტის ფარგლებში დაფინანსების მიღება ფასიანი ქაღალდების კომისიაში (SEC) რეგისტრაციის გარეშე შეეძლებათ, რაც ახალი პროექტებისთვის დამატებითი შესაძლებლობა იქნება.

კანონპროექტი პირველად განსაზღვრავს, რა პირობებში ჩაითვლება კრიპტოპლატფორმა სრულად დეცენტრალიზებულად. თუ პლატფორმა მომხმარებლების შეზღუდვას ან ოპერაციებში ჩარევას შეძლებს, მას ფინანსური ინსტიტუტებისთვის დაწესებული მოთხოვნების შესრულება მოუწევს.

წყარო: Yahoo Finance