აშშ კრიპტობირჟებისთვის საერთო ფედერალური წესების შემოღებას გეგმავს

აშშ-ის სასაქონლო ფიუჩერსებით ვაჭრობის კომისიამ (CFTC) კრიპტობირჟებისთვის ახალი წესები წარადგინა. ცვლილებები იმ კრიპტობირჟებს შეეხება, სადაც მომხმარებლებს ნასესხები თანხითაც შეუძლიათ ვაჭრობა.

კრიპტობირჟებს ახალ ფედერალურ სისტემაში ჩართვა საკუთარი სურვილით შეეძლებათ. თუ ამ გზას აირჩევენ, სხვადასხვა შტატში ცალკე ლიცენზიის აღება აღარ მოუწევთ და CFTC-ის ერთიანი წესებით იმუშავებენ.

CFTC კრიპტობირჟებისთვის ცალკე სტატუსის შემოღებასაც გეგმავს. ამ სისტემაში ჩართულ პლატფორმებს მომხმარებლების თანხების დასაფარად საკმარისი რეზერვების შენახვა და ფასებით მანიპულაციის წინააღმდეგ კონტროლის გამკაცრება მოუწევთ. მომხმარებელთა გარიგებები კი რეგისტრირებული ფიუჩერსული ბროკერების მონაწილეობით განხორციელდება.

ჯერჯერობით განსაზღვრული არ არის, რა მოცულობის თანხის სესხება შეეძლებათ მომხმარებლებს. ახალი წესები მას შემდეგ მომზადდა, რაც კონგრესში Clarity Act-ის განხილვა შეჩერდა. კანონპროექტს აშშ-ის კრიპტობაზრისთვის საერთო წესები უნდა დაედგინა, თუმცა რადგან CFTC-ის ინიციატივა კონგრესის მიერ მიღებულ ცალკე კანონს არ ეფუძნება, მისი გასაჩივრება სასამართლოში შესაძლებელია. მომავალ ადმინისტრაციას კი ამ წესების შეცვლაც შეეძლება.

წყარო: Investing.com