Bank of America ევროპული აქციების ფასების შემცირებას პროგნოზირებს
Bank of America-ს შეფასებით, წლის მეოთხე კვარტლის დასაწყისისთვის ევროპული აქციების ფასები შესაძლოა 5%-ზე მეტით შემცირდეს. ანალიტიკოსები ამას კომპანიების მოგების მიმართ არსებული მაღალი მოლოდინებით ხსნიან.
მიუხედავად იმისა, რომ ბოლო პერიოდში ინფლაციისა და ევროპული ეკონომიკის ზრდის მაჩვენებლები გაუმჯობესდა, ანალიტიკოსები მიიჩნევენ, რომ ეს დადებითი ფაქტორები აქციების მიმდინარე ფასებში უკვე გათვალისწინებულია.
ერთ-ერთ მთავარ რისკად ხელოვნური ინტელექტის სფეროში გაზრდილი ხარჯები სახელდება. აშშ-ის მსხვილმა ტექნოლოგიურმა კომპანიებმა ხელოვნური ინტელექტის განვითარებაში ინვესტიციები მნიშვნელოვნად გაზარდეს, თუმცა ჯერჯერობით გაურკვეველია, რა შემოსავალს მიიღებენ ამ დანახარჯებიდან. ამან შესაძლოა უარყოფითი გავლენა მოახდინოს ევროპულ ნახევარგამტარებისა და სამრეწველო აღჭურვილობის კომპანიებზე.
კიდევ ერთი რისკი ენერგორესურსების შესაძლო გაძვირებაა. ახლო აღმოსავლეთში დაძაბულობის გაგრძელების შემთხვევაში, ნავთობის ფასმა შესაძლოა ბარელზე 100 დოლარს გადააჭარბოს.
ამასთან, აშშ-ის შრომის ბაზრის შესუსტებამ და კერძო კრედიტების სფეროში არსებულმა პრობლემებმა შესაძლოა გლობალური მოთხოვნაც შეამციროს.
ასეთ ვითარებაში Bank of America-ს ანალიტიკოსები ინვესტორებს სურსათის, სასმელების, ფარმაცევტიკისა და ტელეკომუნიკაციების კომპანიებზე ყურადღების გამახვილებას ურჩევენ. საბანკო და ტექნოლოგიურ სექტორებში ინვესტირებას კი შედარებით სარისკოდ მიიჩნევენ.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
