ბიტკოინის ფასი შესაძლოა 40 000 დოლარზე დაბლა დაეცეს
კრიპტოვალუტის ბაზარზე არასტაბილურობა გრძელდება. Wolfe Research-ის ანალიტიკოსების შეფასებით, ბიტკოინის ფასი ოქტომბრის ბოლოსთვის შესაძლოა 40 000 დოლარზე დაბლა ჩამოვიდეს.
ბიტკოინმა 200-დღიანი საშუალო მაჩვენებლის შენარჩუნება ვერ შეძლო, რის შემდეგაც მისი ფასი დაახლოებით 20 პროცენტით შემცირდა. ანალიტიკოსების აზრით, კრიპტოვალუტა ბოლო პერიოდში ნაკლებად მიჰყვება ტექნოლოგიური აქციებისა და სხვა რისკიანი აქტივების ზრდას. მათი შეფასებით, ბიტკოინმა ინფლაციისგან დაცვის ფუნქციაც დაკარგა, ხოლო თავისუფალი კაპიტალის ნაწილი ახლა ხელოვნური ინტელექტისა და ნახევარგამტარების მიმართულებით მიედინება.
Wolfe Research-ის პროგნოზი ბიტკოინის ოთხწლიან ციკლსაც ეყრდნობა. ამ მოდელის მიხედვით, ფასის ყველაზე მაღალი ნიშნულიდან მინიმუმამდე ვარდნა ისტორიულად საშუალოდ 79 პროცენტს აღწევდა. ამიტომ კომპანიაში მიიჩნევენ, რომ ბიტკოინზე ზეწოლა შეიძლება გაგრძელდეს, მიუხედავად იმისა, რომ ამერიკული საფონდო ინდექსები ტექნოლოგიური სექტორის ზრდის ფონზე ბოლო კვირებში რეკორდულ დონეს უახლოვდება.
წყარო: Investing.com
