Botanix მუშაობას წყვეტს და მომხმარებლებს თანხის გატანას სთხოვს
ბიტკოინზე დაფუძნებული დამხმარე ქსელი Botanix მუშაობას წყვეტს. პროექტის ადმინისტრაცია მომხმარებლებს აფრთხილებს, რომ ციფრული აქტივები ქსელიდან 9 ივლისამდე გაიტანონ, რადგან ამის შემდეგ თანხის დაბრუნება შეუძლებელი იქნება.
Botanix ბიტკოინის მეორე შრის ქსელად შეიქმნა. მარტივად რომ ვთქვათ, ეს იყო ბიტკოინზე დამატებული სისტემა, სადაც ტრანზაქციები უფრო სწრაფი და იაფი უნდა ყოფილიყო. პროექტი მომხმარებლებს ბიტკოინით ვაჭრობას, სესხების აღებასა და სხვა ფინანსურ სერვისებს სთავაზობდა.თუმცა პროექტმა საკმარისი მომხმარებელი ვერ მოიზიდა. Botanix-ის განმარტებით, ბიტკოინის მფლობელები მას კვლავ ძირითადად გრძელვადიან აქტივად ინახავენ და არა ყოველდღიური ფინანსური ოპერაციებისთვის იყენებენ.
პრობლემა ფინანსურ მაჩვენებლებშიც გამოჩნდა. სექტემბერში ქსელში განთავსებული აქტივების ჯამური ღირებულება 26 მილიონ დოლარს აჭარბებდა, ბოლო მონაცემებით კი ეს მაჩვენებელი დაახლოებით 120 000 დოლარამდე შემცირდა. დღიური საკომისიო შემოსავალი მხოლოდ 10 დოლარს შეადგენს.
პროექტმა 2024 წელს 8.5 მილიონი დოლარის ინვესტიცია მოიზიდა, თუმცა კონკურენცია და დაბალი მოთხოვნა გადამწყვეტი აღმოჩნდა. Botanix-ის განცხადებით, ქსელის შენახვის ხარჯები მიღებულ შემოსავალზე ბევრად მაღალი იყო, რის გამოც მუშაობის გაგრძელება აღარ გამართლდა.
წყარო: yahoo Finance
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
