ჩინელი ჰაკერები DeepSeek-ს კიბერშეტევებისთვის იყენებენ
ჩინეთის ხელისუფლებასთან დაკავშირებული ჰაკერული ჯგუფები კიბერშეტევების მოსამზადებლად DeepSeek-სა და სხვა ღია ხელოვნური ინტელექტის მოდელებს იყენებენ. ტაივანური კვლევითი კომპანია TeamT5-ის მონაცემებით, ამ ტექნოლოგიების გამოყენების შემდეგ მათ მიერ განხორციელებული შეტევების რაოდენობა ორჯერ მეტად გაიზარდა.
ჰაკერები ხელოვნურ ინტელექტს კიბერშეტევების სხვადასხვა ეტაპზე იყენებენ. მისი საშუალებით აგროვებენ ინფორმაციას სამიზნეებზე, ეძებენ სისტემების სისუსტეებს და ქმნიან შეტევისთვის საჭირო კოდს.
TeamT5-ის ინფორმაციით, ჩინურ ჰაკერულ ჯგუფებში განსაკუთრებით ხშირად DeepSeek გამოიყენება, რადგან მოდელს შედარებით ნაკლები უსაფრთხოების შეზღუდვა აქვს და მისი გამოყენებაც იაფია.
კვლევითმა კომპანიამ რამდენიმე კონკრეტული შემთხვევაც გამოავლინა. ჰაკერულმა ჯგუფმა Grimfengxi-მ DeepSeek სისტემებში შეღწევისთვის საჭირო კოდის შესაქმნელად გამოიყენა. Huapi-მ ხელოვნური ინტელექტის ჩინური მოდელის დახმარებით ტაივანური კომპანიის ელექტრონული ფოსტის სისტემაზე მიიტანა შეტევა. მკვლევრები ვარაუდობენ, რომ ამ შემთხვევაშიც DeepSeek გამოიყენეს.
კიდევ ერთმა ჯგუფმა, Teleboyi-მ, ხელოვნური ინტელექტის დახმარებით ინტერნეტში 1,000 IP მისამართი მოიძია და სხვადასხვა კომპანიის ვებგვერდებთან დაკავშირებული ინფორმაცია შეაგროვა.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
