Citi ნახევარგამტარების სექტორში სამ ფავორიტს ასახელებს

ნახევარგამტარების სექტორში ბოლო დღეებში დაფიქსირებული ვარდნის მიუხედავად, საინვესტიციო ბანკი Citi ინდუსტრიის მიმართ ოპტიმისტურადაა განწყობილი. ბანკის შეფასებით, ეს უფრო დროებითი ვარდნაა და სექტორის მიმართ ინტერესი კვლავ მაღალი რჩება.

Citi-ის ფავორიტებად Broadcom, Texas Instruments და Applied Materials სახელდება. ანალიტიკოსების შეფასებით, 2027 წლისთვის სექტორის კომპანიების მოგების პროგნოზები საშუალოდ 11-12 პროცენტით არის გაზრდილი.

ბაზარზე სულ უფრო ხშირად საუბრობენ მიწოდებასთან დაკავშირებულ შესაძლო გამოწვევებზეც. მთავარი რისკი გარკვეული კომპონენტებისა და DRAM მეხსიერების დეფიციტს უკავშირდება, რაც განსაკუთრებით 2027 წელს შეიძლება გახდეს აქტუალური. მიუხედავად ამისა, ნახევარგამტარებზე მოთხოვნა კვლავ მაღალია.

ზრდის მთავარი წყარო მონაცემთა ცენტრებია, რომელთა განვითარებასაც ხელოვნური ინტელექტის ინფრასტრუქტურაზე მზარდი მოთხოვნა განაპირობებს. Citi-ის შეფასებით, ამ მიმართულებაზე სექტორის საერთო მოთხოვნის დაახლოებით მესამედი მოდის.

მეორე მხრივ, პერსონალური კომპიუტერებისა და მობილური ტელეფონების ბაზარზე შედარებით სუსტი შედეგებია. ამის მიზეზად ანალიტიკოსები მომხმარებლების ხარჯების შემცირებასა და მიწოდებასთან დაკავშირებულ სირთულეებს ასახელებენ. ამ ფონზე, ავტომობილებისა და სამრეწველო ტექნოლოგიების მიმართულებები სტაბილურად იზრდება.

Citi მიიჩნევს, რომ მიუხედავად მოკლევადიანი რყევებისა, ნახევარგამტარების სექტორში ზრდის პოტენციალი კვლავ არსებობს.

წყარო: Investing.com