DHL Europe ზაფხულისთვის ავიაციის საწვავის მარაგების სტაბილურობას ადასტურებს
DHL Express Europe-ის აღმასრულებელი დირექტორის, მაიკ პარას განცხადებით, კომპანიამ ზაფხულის თვეებისთვის ავიაციის საწვავის საჭირო მარაგები უკვე უზრუნველყო და ირანის ომთან დაკავშირებული გაურკვევლობის მიუხედავად, ოპერაციების შეფერხებას არ ელოდება.
Reuters-თან საუბრისას პარამ აღნიშნა, რომ DHL-ის მთავარ ჰაბებში, სატრანზიტო ცენტრებსა და ქალაქებში ამჟამად საწვავის დეფიციტის საფრთხე არ არსებობს და კომპანიის საქმიანობა შეუფერხებლად მიმდინარეობს.
მისი თქმით, ბოლო კვირების განმავლობაში ავიაციის საწვავის ბაზარი შედარებით დასტაბილურდა, რაც მოთხოვნის შემცირებამ და ევროპაში აშშ-დან, ნიგერიიდან და სამხრეთ კორეიდან გაზრდილმა იმპორტმა განაპირობა.
„ჯერჯერობით საწვავის დეფიციტი არ დაფიქსირებულა,“ - განაცხადა პარამ.
DHL-ის ხელმძღვანელის თქმით, კომპანიის გლობალური ლოგისტიკური ქსელი და საგანგებო გეგმები შესაძლო ლოკალური პრობლემების ეფექტურად მართვის შესაძლებლობას იძლევა. საჭიროების შემთხვევაში, თვითმფრინავების საწვავით მომარაგება ალტერნატიულ ლოკაციებზე შეიძლება განხორციელდეს, შეიცვალოს ფრენის მარშრუტები ან ტვირთების ნაწილი სახმელეთო ტრანსპორტით გადაიტანონ.
პარას შეფასებით, კომპანია მუდმივად აკვირდება ვითარებას და უკიდურესი სცენარის შემთხვევაშიც ოპერაციების უწყვეტობის შესანარჩუნებლად საკმარისი რესურსები და მოქნილი ქსელი გააჩნია.
