ევროკავშირი მსხვილი კომპანიებისთვის ანტიმონოპოლიურ წესებს ცვლის

ევროკომისიამ ანტიმონოპოლიური წესები განაახლა და მსხვილ კომპანიებს გარკვეულ შემთხვევებში საშუალება მისცა, საკუთარი გადაწყვეტილებები გარემოსდაცვითი სარგებლის არგუმენტით გაამართლონ.

ცვლილება ევროკავშირის კონკურენციის კანონმდებლობის 102-ე მუხლს ეხება. ეს მუხლი კომპანიებს უკრძალავს, ბაზარზე დომინანტური მდგომარეობა კონკურენტების შესაზღუდად გამოიყენონ. სწორედ ამ მუხლის საფუძველზე დაუჯარიმებია ევროკავშირს Apple, Google და Microsoft.

ახალი წესებით, ევროკომისიამ შეიძლება გაითვალისწინოს, თუ კომპანიის გადაწყვეტილება ამცირებს ნედლეულის გამოყენებას ან დაბინძურებას, ზრდის გადამუშავებადი პროდუქციის წილს ან მომხმარებლის ხარჯებს ამცირებს.

ცვლილებას კრიტიკაც მოჰყვა. 28 ეკონომისტისა და აკადემიკოსის ჯგუფმა ურსულა ფონ დერ ლაიენსა და ევროკავშირის კონკურენციის კომისარ ტერეზა რიბერას მიმართა. მათი აზრით, ახალი წესები მსხვილ კომპანიებს მეტ შესაძლებლობას მისცემს, კონკურენტებისთვის ხელის შემშლელი გადაწყვეტილებები გარემოსდაცვითი სარგებლის არგუმენტით გაამართლონ.

ევროკომისია, როგორც წესი, დომინანტურ კომპანიად მიიჩნევს მას, ვისაც შესაბამის ბაზარზე 40%-ზე მეტი წილი უკავია.

წყარო: Reuters