ევროკავშირი ნავთობისა და გაზის კომპანიებისთვის დამატებითი გადასახადის შემოღებას განიხილავს

ევროკომისია განიხილავს, დაწესდეს თუ არა ევროკავშირის მასშტაბით დამატებითი გადასახადი ნავთობისა და გაზის კომპანიებზე, რომლებმაც ენერგორესურსების გაძვირების შედეგად მნიშვნელოვნად მეტი მოგება მიიღეს. ამ გზით მიღებული თანხა შესაძლოა მოსახლეობისთვის მაღალი ენერგეტიკული ხარჯების შესამსუბუქებლად გამოიყენონ.

ევროკავშირის კლიმატისა და გადასახადების კომისრის, ვოპკე ჰუკსტრას თქმით, სპეციალური ჯგუფი შეაფასებს, რამდენად ეფექტიანი იქნება ასეთი გადასახადი და რა პრობლემები შეიძლება მოჰყვეს მის შემოღებას. ინიციატივას გერმანია, ესპანეთი, პორტუგალია, იტალია, პოლონეთი და ავსტრია უჭერენ მხარს.

მსგავსი ზომა ევროკავშირმა 2022 წელსაც გამოიყენა. მაშინ კომპანიებს დამატებითი გადასახადი დაეკისრათ მოგების იმ ნაწილზე, რომელიც წინა წლების საშუალო მაჩვენებელს 20%-ზე მეტით აჭარბებდა. მინიმალური განაკვეთი 33% იყო და ამ გზით თითქმის 29 მილიარდი ევრო შეგროვდა.

ახალი გადასახადის შემოღებას შესაძლოა კომპანიების მხრიდან სასამართლო დავები მოჰყვეს. ExxonMobil და სხვა კომპანიები 2022 წელს მიღებულ გადაწყვეტილებას დღემდე ასაჩივრებენ. ამასთან, რამდენიმე ქვეყანამ მსგავსი გადასახადი უკვე საკუთარი წესებით შემოიღო.

პორტუგალიაში, მაგალითად, ნავთობისა და გადამამუშავებელი კომპანიების 2026 წლის დამატებით მოგებაზე 33%-იანი გადასახადი მოქმედებს.

წყარო: Reuters