ევროკავშირი სახელმწიფო შესყიდვებში ევროპულ კომპანიებს მეტ უპირატესობას მიანიჭებს

ევროკომისიამ სახელმწიფო შესყიდვების ახალი წესები წარადგინა, რომლებიც ტენდერების გამარტივებას და უცხოურ კომპანიებზე დამოკიდებულების შემცირებას ისახავს მიზნად. ცვლილებები ევროკავშირის მასშტაბით ერთიანი ციფრული პლატფორმის შექმნასაც ითვალისწინებს.

ევროკავშირში სახელმწიფო შესყიდვებზე წელიწადში დაახლოებით €2.5 ტრილიონი იხარჯება, რაც ევროკავშირის ეკონომიკის დაახლოებით 15%-ს შეადგენს. ახალი წესებით, სახელმწიფო კონტრაქტების გაცემისას მხოლოდ ყველაზე დაბალი ფასი აღარ იქნება გადამწყვეტი. შეფასებისას ხარისხს მინიმუმ 30%-იანი მნიშვნელობა მიენიჭება, ხოლო იმ სფეროებში, სადაც სამუშაოს დიდი ნაწილი ადამიანურ შრომაზეა დამოკიდებული, მინიმუმ 50%.

ცვლილებები ევროკავშირის ქვეყნებს საშუალებას მისცემს, გარკვეულ შემთხვევებში ტენდერებიდან გამორიცხონ შეთავაზებები, რომლებშიც ევროპული წარმოების წილი 50%-ზე ნაკლებია. რეგულაცია განსაკუთრებით ეხება ჩინეთიდან შემოსულ იაფ პროდუქციასთან კონკურენციას და ისეთ სფეროებს, სადაც ევროკავშირი უცხოურ კომპანიებზე დამოკიდებულების შემცირებას ცდილობს.

წინადადება ჯერ საბოლოოდ დამტკიცებული არ არის და ძალაში შესვლამდე შესაბამისი პროცედურები უნდა გაიაროს.

წყარო: Reuters