ევროკავშირმა Google თითქმის 900 მილიონი ევროთი დააჯარიმა

ევროკომისიამ Google-ს ციფრული ბაზრების წესების დარღვევისთვის ჯამში 890 მილიონი ევროს, ანუ დაახლოებით 1 მილიარდი დოლარის ჯარიმა დააკისრა. ევროკავშირის შეფასებით, კომპანია საკუთარ სერვისებს კონკურენტებთან შედარებით უპირატეს მდგომარეობაში აყენებდა და აპლიკაციების დეველოპერებს მომხმარებლებისთვის უფრო იაფი ალტერნატივების შეთავაზებას უზღუდავდა.

ჯარიმებიდან 460 მილიონი ევრო Google Search-ში კომპანიის საკუთარი სერვისების წინ წამოწევას უკავშირდება. საუბარია საყიდლების, სასტუმროების, ტრანსპორტისა და სპორტული შედეგების ძიებაზე. დარჩენილი 430 მილიონი ევრო კი Google Play-ის წესებს ეხება, რომლებიც დეველოპერებს მომხმარებლების სხვა აპლიკაციების მაღაზიებსა და ვებგვერდებზე გადამისამართებას უშლიდა ხელს.

ეს Google-ისთვის ევროკავშირის ციფრული ბაზრების აქტის ფარგლებში დაკისრებული პირველი ჯარიმებია. ბოლო თითქმის 20 წლის განმავლობაში კი ანტიკონკურენტული ქმედებების გამო კომპანიისთვის დაკისრებულმა ჯარიმებმა საერთო ჯამში 10.38 მილიარდ ევროს მიაღწია.

Google-ს ევროკომისიის მოთხოვნების შესასრულებლად 60 დღე აქვს. კომპანიამ უნდა უზრუნველყოს, რომ საძიებო სისტემაში კონკურენტების სერვისები თანაბარ პირობებში გამოჩნდეს, ხოლო დეველოპერებს Google Play-ის გარეთ არსებული შეთავაზებების თავისუფლად მითითების შესაძლებლობა ჰქონდეთ.

Google ევროკავშირის გადაწყვეტილებას არ ეთანხმება და სასამართლოში გასაჩივრებასაც არ გამორიცხავს. კომპანიის განცხადებით, ახალი მოთხოვნების შესრულება ევროპელი მომხმარებლებისთვის საძიებო სისტემის ზოგიერთი ფუნქციის გაუქმებასა და Google Play-ის უსაფრთხოების მექანიზმების შესუსტებას გამოიწვევს.

უწყების განცხადებით, Google-თან მოლაპარაკებები მიმდინარეობს და კომპანიამ წესებთან შესაბამისობისთვის უკვე დაიწყო ცვლილებების განხორციელება.

წყარო: Investing.com