ევროკავშირმა Temu უკანონო პროდუქციის გაყიდვის გამო 232 მილიონი დოლარით დააჯარიმა
ევროკავშირის მარეგულირებელმა ჩინური ონლაინ პლატფორმა Temu 200 მილიონი ევროთი დააჯარიმა. ევროკომისიის შეფასებით, კომპანიამ ვერ მიიღო საკმარისი ზომები პლატფორმაზე უკანონო პროდუქციის გავრცელების შესაჩერებლად.
გადაწყვეტილება თითქმის ორწლიან გამოძიებას მოჰყვა. ევროკომისიის განცხადებით, Temu-მ ვერ შეაფასა ის რისკები, რომლებიც მომხმარებლებისთვის პრობლემას ქმნიდა და ამით „ციფრული მომსახურების შესახებ აქტის“ მოთხოვნები დაარღვია.
გამოძიება მომხმარებელთა ორგანიზაციების გაერთიანება BEUC-ის საჩივრის საფუძველზე დაიწყო. რეგულატორების შეფასებით, Temu-ს სარეკომენდაციო სისტემა და ინფლუენსერებთან დაკავშირებული სარეკლამო პროგრამები ხელს უწყობდა ისეთი პროდუქციის გავრცელებას, რომელიც ევროკავშირის წესებს არ შეესაბამებოდა.
კომპანიაში გადაწყვეტილებას არ ეთანხმებიან, ამავდროულად, Temu აცხადებს, რომ პლატფორმაზე უსაფრთხოების მექანიზმები უკვე გააძლიერა. ევროკომისიამ კომპანიას 28 აგვისტომდე მისცა ვადა, რათა ახალი სამოქმედო გეგმა წარადგინოს. ამის შემდეგ მარეგულირებლები საბოლოო გადაწყვეტილებას მიიღებენ. ეს არის ერთ-ერთი ყველაზე მნიშვნელოვანი სანქცია, რომელიც ევროკავშირმა „ციფრული მომსახურების შესახებ აქტის“ ფარგლებში დააწესა. გასულ წელს მსგავსი წესების დარღვევისთვის X 120 მილიონი ევროთი დაჯარიმდა.
წყარო: Investing.com
