ფარმაცევტული ინდუსტრია ტრამპის ადმინისტრაციას წამლების ფასების ახალი წესის გამო უჩივის

აშშ-ის ფარმაცევტული კომპანიების მთავარი ლობისტური ორგანიზაცია PhRMA ტრამპის ადმინისტრაციას სასამართლოში უჩივის. დავა ახალ წესს ეხება, რომლის მიხედვითაც Medicare საავადმყოფოებში გამოყენებული ზოგიერთი წამლის ანაზღაურებას სხვა ქვეყნებში მოქმედ ფასებზე დაყრდნობით განსაზღვრავს.

PhRMA-ს განცხადებით, Medicare-ის მარეგულირებელი უწყება თავის უფლებამოსილებას სცდება და წამლების ფასების განსაზღვრის წესს კონგრესის თანხმობის გარეშე ცვლის. სარჩელი ვაშინგტონის ფედერალურ სასამართლოში შევიდა. მოპასუხეებს შორის არიან ჯანდაცვის მინისტრი რობერტ კენედი უმცროსი და Medicare-ისა და Medicaid-ის სერვისების ცენტრები.

საბოლოო წესს თავდაპირველ გეგმასთან შედარებით უფრო მცირე გავლენა ექნება. ის არ გავრცელდება იმ კომპანიებზე, რომლებმაც თეთრ სახლთან წამლების ფასებზე ცალკე შეთანხმება უკვე გააფორმეს. ასეთი შეთანხმება ოცზე მეტ მწარმოებელს აქვს, მათ შორის Pfizer-ს, Eli Lilly-სა და Novo Nordisk-ს.

აშშ-ის ხელისუფლების შეფასებით, ახალი წესით შვიდ წელიწადში დაახლოებით 440 მილიონი დოლარის დაზოგვა იქნება შესაძლებელი.

წყარო: Reuters