Gemini-ს ყოველთვიური მომხმარებლების რაოდენობამ 1 მილიარდს გადააჭარბა

Google-ის განცხადებით, Gemini-ს ყოველთვიური მომხმარებლების რაოდენობამ 1 მილიარდს გადააჭარბა. კომპანიის ინფორმაციით, ეს მის ისტორიაში ერთ-ერთი ყველაზე სწრაფად მზარდი პროდუქტია.

Gemini-ს გამოყენება მხოლოდ ტექსტურ კითხვებზე პასუხით აღარ შემოიფარგლება. მომხმარებლების 63% ასისტენტს ხმოვანი ბრძანებებით იყენებს, ხოლო სულ უფრო მეტი ადამიანი მას მხოლოდ ხმითაც მართავს.

იზრდება კამერისა და ეკრანის გაზიარების გამოყენებაც. Google-ის მონაცემებით, Gemini Live-ის ყოველი მეხუთე სესია ხმოვან კომუნიკაციასთან ერთად ვიზუალურ ინფორმაციასაც მოიცავს. ამ ფუნქციებს განსაკუთრებით ხშირად იყენებენ სტუდენტები და ადამიანები, რომლებიც ყოველდღიურ პრაქტიკულ ამოცანებს ასრულებენ.

კომპანიის ცნობით, Gemini დღეში 150 მილიონზე მეტ სურათს ქმნის. პლატფორმას მცირე ბიზნესებიც აქტიურად იყენებენ სარეკლამო და სხვა ვიზუალური მასალის მოსამზადებლად. Android-ზე Gemini უკვე 40-ზე მეტ პოპულარულ აპლიკაციაში სხვადასხვა მოქმედების შესრულებასაც ახერხებს, მათ შორის ტაქსის გამოძახებასა და რესტორანში მაგიდის დაჯავშნას. iOS-ზე კი სერვისს 100 მილიონზე მეტი აქტიური მომხმარებელი ჰყავს.

წყარო: Investing.com