გერმანია ჩინური ავტომობილების ტარიფების გაზრდას განიხილავს
მას შემდეგ, რაც Volkswagen-ის რამდენიმე ქარხნის დახურვის შესახებ გავრცელდა ინფორმაცია, გერმანიაში ჩინურ ავტომობილებზე ტარიფების გაზრდაზე დაიწყეს საუბარი.
საქსონიის ეკონომიკის მინისტრმა დირკ პანტერმა ევროკავშირს მოუწოდა, ჩინეთიდან შემოტანილ ავტომობილებზე მოქმედი ტარიფები გაზარდოს. მისი აზრით, ამან შესაძლოა ჩინურ კომპანიებს ევროპელ მწარმოებლებთან თანამშრომლობა და ადგილობრივი წარმოების დაწყება აიძულოს.
ეს განცხადება მას შემდეგ გაკეთდა, რაც გავრცელდა ინფორმაცია, რომ Volkswagen გერმანიაში ოთხი ქარხნის დახურვას განიხილავს. მათ შორისაა საქსონიაში მდებარე ელექტრომობილების საწარმოც.
Volkswagen-ის ხელმძღვანელი ოლივერ ბლუმი ერთ-ერთ გამოსავლად ჩინური ავტომობილების ევროპაში წარმოებასა და აზიურ კომპანიებთან ერთობლივი საწარმოების შექმნას ასახელებს. პანტერის თქმით, თუ ჩინური კომპანიები საქსონიაში წარმოებას დაიწყებენ, ეს სამუშაო ადგილების შენარჩუნებას შეუწყობს ხელს და ტარიფებთან დაკავშირებულ საკითხებზეც მოლაპარაკების შესაძლებლობას შექმნის. ჩინური ავტომწარმოებლები, მათ შორის BYD, ევროპაში გაყიდვებს სწრაფად ზრდიან.
გერმანიაში მიიჩნევენ, რომ თუ ჩინურ კომპანიებს ევროპულ ბაზარზე მუშაობა სურთ, წარმოების ნაწილი ევროპაშიც უნდა განათავსონ და ადგილობრივი სამუშაო ადგილების შექმნაში მიიღონ მონაწილეობა.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
