გერმანია სიგარეტზე, შაქრიან სასმელებსა და ალკოჰოლზე გადასახადებს ზრდის

გერმანია თამბაქოს ნაწარმზე, შაქრიან სასმელებსა და ალკოჰოლის გარკვეულ სახეობებზე გადასახადების გაზრდას გეგმავს. ცვლილებები, ერთი მხრივ, სახელმწიფო ბიუჯეტის შემოსავლების ზრდას, მეორე მხრივ კი საზოგადოებრივი ჯანმრთელობის გაუმჯობესებას ისახავს მიზნად.

ხუთშაბათს კანონმდებლებმა თამბაქოს გადასახადის ზრდას დაუჭირეს მხარი. მოსალოდნელია, რომ ეს ღონისძიება 2027-2030 წლებში 12 მილიარდ ევროზე მეტ შემოსავალს მოიტანს. ცვლილებების შედეგად, ათწლეულის ბოლოს სიგარეტის ერთი კოლოფის საშუალო ფასი 11 ევროს გადააჭარბებს.

შაქრიანი სასმელების გადასახადი კი 2027 წლის ივლისიდან ამოქმედდება. გერმანიის მთავრობამ შესაბამისი გადაწყვეტილება ოთხშაბათს დაამტკიცა. გადასახადი შეეხება გამაგრილებელ სასმელებს, რომლებიც 100 მილილიტრზე მინიმუმ 5 გრამ შაქარს შეიცავს. ასეთი სასმელებისთვის გადასახადი ლიტრზე 0.26 ევრო იქნება, ხოლო უფრო მაღალი შაქრის შემცველობის პროდუქტებზე განაკვეთი 0.32 ევრომდე გაიზრდება.

ფინანსთა სამინისტროს პროგნოზით, შაქრის გადასახადი 2027 წელს 690 მილიონ ევროს, ხოლო 2028 წელს 925 მილიონ ევროს მოიტანს. მიღებული თანხა ფედერალური ჯანმრთელობის დაზღვევის სუბსიდიების შემცირებით გამოწვეული დანაკლისის ნაწილობრივ ანაზღაურებას მოხმარდება.

სამინისტროს შეფასებით, შაქრიანი სასმელების მოხმარებასთან დაკავშირებული ჯანმრთელობის პრობლემები გერმანიის ჯანდაცვის სისტემას ყოველწლიურად დაახლოებით 2.1 მილიარდი ევრო უჯდება.

გერმანია 2027 წლიდან ალკოჰოლური სასმელების გარკვეულ სახეობებზეც გადასახადების 20%-ით გაზრდას გეგმავს. ცვლილება შეეხება მაგარ ალკოჰოლურ სასმელებს, ცქრიალა ღვინოსა და ე.წ. alcopops-ს — ტკბილ, მზა ალკოჰოლურ კოქტეილებს. მოსალოდნელია, რომ ეს ღონისძიება ბიუჯეტს დამატებით ასობით მილიონ ევროს მოუტანს. ამასთან, ლუდისა და ჩვეულებრივი, არაცქრიალა ღვინის გადასახადები უცვლელი დარჩება.

თუმცა, თამბაქოს გადასახადის ზრდას ოპოზიციური პარტიები აკრიტიკებენ. მათი შეფასებით, ცვლილება მომხმარებლებისთვის დამატებითი ფინანსური ტვირთი იქნება და შესაძლოა არალეგალური ბაზრის გაფართოებასაც შეუწყოს ხელი.

მსგავსი ზომები ევროპის სხვა ქვეყნებშიც განიხილება ან უკვე ხორციელდება. დიდმა ბრიტანეთმა შაქრიანი სასმელების გადასახადის მოქმედების არეალის გაფართოება გადაწყვიტა და იმ ზღვრის შემცირებას გეგმავს, რომლის გადაჭარბების შემთხვევაშიც სასმელი დაბეგვრას ექვემდებარება. საფრანგეთი კი თამბაქოზე გადასახადებს ეტაპობრივად ზრდის და 2027 წლისთვის სიგარეტის ერთი კოლოფის ფასის დაახლოებით 13 ევრომდე გაზრდას ისახავს მიზნად.

გერმანიაში ცქრიალა ღვინოზე მოქმედ გადასახადს, Sektsteuer-ს, ხანგრძლივი ისტორია აქვს. ის 1902 წელს შემოიღეს და გერმანიის იმპერიის დაცემის, ორი მსოფლიო ომისა და სხვადასხვა მთავრობის ცვლილების მიუხედავად, დღემდე შენარჩუნდა.