გერმანიაში კომპანიები €225 მილიარდზე მეტის ინვესტირებას გეგმავენ

ბერლინში გამართულ საინვესტიციო სამიტზე კომპანიებმა გერმანიაში 225 მილიარდ ევროზე მეტი ღირებულების პროექტები წარადგინეს. გეგმები ენერგეტიკას, მრეწველობასა და ციფრულ ინფრასტრუქტურას მოიცავს.

ერთ-ერთი ყველაზე დიდი ინვესტიცია Amazon-ს ეკუთვნის. კომპანია 2027 წელს გერმანიაში 16 მილიარდ ევროზე მეტის დახარჯვას გეგმავს. თანხა ღრუბლოვან ტექნოლოგიებს, ხელოვნურ ინტელექტს, სატელიტურ ინტერნეტსა და მედიის ბიზნესს მოხმარდება.

Brookfield მომდევნო ხუთი წლის განმავლობაში გერმანიის ენერგეტიკულ, სამრეწველო და ციფრულ პროექტებში ათეულობით მილიარდი ევროს ინვესტირებას გეგმავს.

გერმანულ სტარტაპებში ინვესტიციებს Nvidia-ც გეგმავს. კომპანიამ Agile Robots, Avelios Medical, Mirelo და Reflex Aerospace დაასახელა.

სამიტზე დასახელებული 225 მილიარდი ევრო ჯერ დაგეგმილი ინვესტიციებია და არა უკვე დახარჯული თანხა. მათი განხორციელება კომპანიების მომავალ გადაწყვეტილებებზე იქნება დამოკიდებული.

წყარო: Reuters