Getty Images ვალების შესამცირებლად ბირჟას ტოვებს

Getty Images ვალების შესამცირებლად აშშ-ში სპეციალურ გაკოტრების პროცედურას იწყებს. ეს კომპანიას მუშაობის გაგრძელების საშუალებას მისცემს, სანამ კრედიტორებთან ვალის გადახდის ახალ პირობებზე შეთანხმდება. პროცესის დასრულება წლის ბოლომდე იგეგმება.

ამის შემდეგ Getty Images კერძო კომპანია გახდება და ბირჟაზე მისი აქციებით ვაჭრობა შეწყდება. კომპანიის მფლობელები Getty-ის ოჯახთან დაკავშირებული კომპანიები და Koch Equity Development გახდებიან. ისინი Getty Images-ს 533 მილიონ დოლარამდე გადასცემენ.

შეთანხმების მიხედვით, 270 მილიონი დოლარის ღირებულების ობლიგაციები გაუქმდება, დანარჩენ სესხებზე კი პროცენტი შემცირდება და მათი დაფარვის ვადა გახანგრძლივდება. Getty Images მუშაობას ჩვეულებრივ გააგრძელებს და პარტნიორებთან გადახდების შეჩერებას არ გეგმავს. ივნისის ბოლოს კომპანიას დაახლოებით 2.1 მილიარდი დოლარის ვალი ჰქონდა, მაშინ როცა ოქტომბრის დასაწყისში მისი საბაზრო ღირებულება მხოლოდ 20.7 მილიონ დოლარს შეადგენდა.

კომპანია ბირჟაზე 2022 წელს დაბრუნდა და მაშინ 4.8 მილიარდ დოლარად შეფასდა. მას შემდეგ მისი აქციების ფასი დაახლოებით 99%-ით დაეცა. ფინანსური მდგომარეობის გაუარესებას წინ უძღოდა Shutterstock-თან დაგეგმილი 3.7-მილიარდიანი გაერთიანების ჩაშლაც.

წყარო: Reuters