Holtec Nuclear ბირჟაზე გასვლით $900 მილიონამდე მიიღებს

ამერიკული ბირთვული ტექნოლოგიების კომპანია Holtec Nuclear ბირჟაზე გასასვლელად ემზადება. კომპანია IPO-ს ფარგლებში $900 მილიონამდე მიღებას გეგმავს, მისი ღირებულება კი შესაძლოა $10.2 მილიარდამდე შეფასდეს.

Holtec ინვესტორებს 50 მილიონ აქციას შესთავაზებს. ერთი აქციის სავარაუდო ფასი $15-დან $18-მდე იქნება. კომპანია Nasdaq-სა და Nasdaq Texas-ზე HNUC სიმბოლოთი განთავსდება.

1986 წელს დაარსებული Holtec ბირთვული რეაქტორებისთვის საჭირო ტექნიკას აწარმოებს, ბირთვული ნარჩენების შენახვაზე მუშაობს და დახურული სადგურების დემონტაჟშიც მონაწილეობს.

Holtec მიჩიგანში მდებარე 800-მეგავატიანი Palisades-ის ატომური ელექტროსადგურის ხელახლა ამუშავებას გეგმავს. თუ პროექტი წარმატებით დასრულდა, Palisades აშშ-ში პირველი კომერციული ატომური სადგური გახდება, რომელიც დახურვის შემდეგ მუშაობას განაახლებს.

აშშ-ში ბირთვული ენერგიის მიმართ ინტერესი ბოლო პერიოდში გაიზარდა. ერთ-ერთი მიზეზი მონაცემთა ცენტრების სწრაფი ზრდაა, რადგან მათ დიდი რაოდენობით ელექტროენერგია სჭირდებათ.

წყარო: Reuters