ჰორმუზის სრუტეში დაძაბულობის გამო ნავთობი გაძვირდა

ჰორმუზის სრუტეში ვითარების გამწვავებას ნავთობის ფასის ზრდა მოჰყვა. Brent-ის მარკის ნავთობი თითქმის 3%-ით გაძვირდა და ბარელზე 85.20 დოლარს მიაღწია. WTI-ის ფასი კი 80.05 დოლარამდე გაიზარდა.

ვითარება მას შემდეგ დაიძაბა, რაც აშშ-მა ირანის წინააღმდეგ საზღვაო ბლოკადა აღადგინა და სამი ღამის განმავლობაში სამხედრო დარტყმები განახორციელა. დონალდ ტრამპმა ასევე გამოთქვა ინიციატივა, რომ ჰორმუზის სრუტეში უსაფრთხო გადაადგილებისთვის 20%-იანი მოსაკრებელი დაწესდეს.

ვითარება კიდევ უფრო დამძიმდა მას შემდეგ, რაც ირანმა არაბთა გაერთიანებული საამიროების ორი ტანკერი ფრთოსანი რაკეტებით დაბომბა. თავდასხმას ეკიპაჟის ერთი წევრი ემსხვერპლა.

ანალიტიკოსები თვლიან, რომ სამხედრო დაპირისპირება ნავთობის მიწოდებას საფრთხეს უქმნის. ჰორმუზის სრუტეში ტანკერების მოძრაობა ბოლო ორი თვის ყველაზე დაბალ ნიშნულამდე შემცირდა.

ნავთობის ფასის შემდგომი ცვლილება ახლა დიდწილად იმაზეა დამოკიდებული, რამდენად შეიზღუდება გემების გადაადგილება სრუტეში. დამატებით საფრთხეს ქმნის იემენელი ჰუთების სარაკეტო თავდასხმებიც საუდის არაბეთის მიმართულებით.

წყარო: Investing.com