HSBC LVMH-სა და Burberry-ს რეიტინგს ამცირებს
HSBC-მა LVMH-ისა და Burberry-ის აქციების რეიტინგი Buy-დან Hold-მდე შეამცირა. ორივე კომპანიის აქციები 2%-ზე მეტით დაეცა.
ბანკი გადაწყვეტილებას 2026 წლის მეორე ნახევრის მიმართ შეზღუდული ხილვადობითა და luxury სექტორში უფრო რთული წლიური შედარების ბაზით ხსნის. HSBC-ის ანალიტიკოსები მიიჩნევენ, რომ მეორე კვარტალში დაფიქსირებული გაუმჯობესებული დინამიკა შესაძლოა წლის მეორე ნახევარში შენელდეს.
HSBC-ის luxury სექტორის კომპანიების დაფარვაში მეორე კვარტლის ორგანულმა გაყიდვებმა წლიურად 7% მოიმატა, პირველ კვარტალში დაფიქსირებული 5.8%-იანი ზრდის შემდეგ. გაუმჯობესებას ძირითადად სამკაულებზე ძლიერმა მოთხოვნამ და აშშ-სა და აზიაში მომხმარებელთა აქტივობის ზრდამ შეუწყო ხელი.
თუმცა, ბანკის შეფასებით, წლის მეორე ნახევარში მდგომარეობა უფრო რთული იქნება. მთავარ რისკებად სახელდება ჩინეთში მომხმარებელთა განწყობის გაუარესება, უფრო მაღალი შედარების ბაზა და luxury ბრენდებთან დაკავშირებული უარყოფითი სოციალური მედიის რეაქციები.
LVMH-ის შემთხვევაში HSBC-მ სამიზნე ფასი €600-დან €490-მდე შეამცირა. ბანკის შეფასებით, Fashion & Leather Goods-ის მიმართულებას, რომელიც 2025 წელს ჯგუფის EBIT-ის 72%-ს ქმნიდა, აღდგენის პროცესი ნელა მიმდინარეობს. Louis Vuitton-ის მასშტაბიც ზრდის პოტენციალს ზღუდავს — ბრენდის გაყიდვები დაახლოებით €20 მილიარდს შეადგენს.
Burberry-ის სამიზნე ფასი კი 1,350-დან 1,200 პენსამდე შემცირდა. HSBC აღიარებს, რომ CEO Josh Schulman-ის ხელმძღვანელობით ბრენდის რესტრუქტურიზაცია პროგრესირებს, თუმცა მიიჩნევს, რომ აქციის შემდგომი ზრდისთვის გაყიდვებისა და მოგების პროგნოზების მნიშვნელოვანი გაუმჯობესების სივრცე შეზღუდულია.
ამასთან, HSBC კვლავ Buy რეიტინგს ინარჩუნებს Richemont-ზე, Kering-ზე, Moncler-სა და Prada-ზე. ბანკის ფავორიტად რჩება Richemont, რომელსაც ძლიერი საიუველირო ბიზნესი და ეფექტური მენეჯმენტი ეხმარება.
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
