Huawei ჩიპების მიმართულებით ახალ ტექნოლოგიურ გეგმას აანონსებს
Huawei-ის ახალი განცხადების შემდეგ ჩინური ჩიპების მწარმოებელი კომპანიების აქციების ფასი მკვეთრად გაიზარდა. ბაზარი განსაკუთრებით კომპანიის იმ გეგმამ გამოაცოცხლა, რომელიც მომდევნო წლებში უფრო ძლიერი და ეფექტური მიკროსქემების შექმნას ეხება.
Huawei აცხადებს, რომ მომდევნო ხუთი წლის განმავლობაში ისეთი ტექნოლოგიური შედეგის მიღწევას გეგმავს, რომელიც 1.4 ნანომეტრიანი ჩიპების დონეს მიუახლოვდება. კომპანია ამ მიზნის მიღწევას მხოლოდ ტრანზისტორების ზომის შემცირებით არ აპირებს. მთავარი აქცენტი ჩიპების შიდა სტრუქტურისა და მუშაობის ეფექტურობის გაუმჯობესებაზე კეთდება.
კომპანია ახალ ტექნიკურ მიდგომებს იყენებს, რომლებიც მონაცემების დამუშავების სიჩქარის გაზრდასა და ჩიპის შიდა კავშირების გამარტივებას ითვალისწინებს. სპეციალისტების შეფასებით, ეს Huawei-ს საშუალებას მისცემს, შეზღუდული ტექნოლოგიური რესურსების პირობებშიც გაზარდოს ჩიპების შესაძლებლობები.
განცხადების შემდეგ ჩინური ჩიპების მწარმოებელი კომპანიების, მათ შორის Semiconductor Manufacturing International Corporation-ისა და Piotech-ის აქციები მკვეთრად გაიზარდა. გაიზარდა სხვა ადგილობრივი ტექნოლოგიური კომპანიების მაჩვენებლებიც.
ამ პროცესს დამატებით მნიშვნელობას აშშ-ის მიერ ჩინეთისთვის დაწესებული ტექნოლოგიური შეზღუდვები აძლევს. განსაკუთრებით მას შემდეგ, რაც Nvidia-ის მოწინავე პროცესორებზე ექსპორტის კონტროლი გამკაცრდა, ჩინური კომპანიები ადგილობრივი ალტერნატივების განვითარებას უფრო აქტიურად ცდილობენ. ამ ფონზე Huawei-ის ხელოვნური ინტელექტის ჩიპები ჩინურ ტექნოლოგიურ სექტორში ერთ-ერთ მთავარ ალტერნატივად განიხილება.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
