იაპონური იენა 1986 წლის შემდეგ ყველაზე დაბალ ნიშნულზეა

იაპონური იენა დოლართან მიმართებით 1986 წლის შემდეგ ყველაზე დაბალ ნიშნულზეა. აზიურ ბაზარზე ერთი დოლარის ფასი 162.40 იენამდე გაიზარდა, რაც ნიშნავს, რომ იენა ბოლო ოთხი ათწლეულის განმავლობაში ყველაზე მეტად გაუფასურდა.

მართალია, იენის გაუფასურება ექსპორტიორ კომპანიებს შემოსავლების გაზრდაში ეხმარება და საფონდო ბირჟაზეც დადებითად აისახება, თუმცა ამავდროულად მნიშვნელოვნად ზრდის იმპორტირებული საქონლისა და ენერგორესურსების ღირებულებას. მაისის თვეში მომსახურების სექტორში ფასების 3.3%-იანი ზრდა დაფიქსირდა, ხოლო საწვავის გაძვირებამ საზღვაო ტვირთების გადაზიდვა 61.8%-ით, საერთაშორისო ავიარეისების ფასი კი 17.3%-ით გაზარდა.

იაპონიის ხელისუფლებამ იენის მხარდასაჭერად აპრილსა და მაისში 11.73 ტრილიონი იენა დახარჯა, თუმცა კურსის ვარდნის შეჩერება მაინც ვერ შეძლო. ანალიტიკოსების შეფასებით, იენაზე ზეწოლა ისევ შენარჩუნდება, რადგან იაპონიასა და აშშ-ს შორის საპროცენტო განაკვეთების სხვაობა დიდია. მაღალი განაკვეთების გამო ინვესტორებისთვის დოლარში ფულის დაბანდება უფრო მომგებიანია, რაც იენის პოზიციებს კიდევ უფრო ასუსტებს.

წყარო: Investing.com