IMF-ისა და მსოფლიო ბანკის შეხვედრა ახალი გადაწყვეტილებების გარეშე დასრულდა
საერთაშორისო სავალუტო ფონდისა და მსოფლიო ბანკის ყოველწლიური შეხვედრა განვითარებადი ქვეყნებისთვის ახალი ზომების გამოცხადების გარეშე დასრულდა. განხილვის მთავარი თემები იყო ომები ახლო აღმოსავლეთსა და უკრაინაში, გაძვირებული ვალი და ხელოვნური ინტელექტის გამო ქვეყნებს შორის ეკონომიკური სხვაობის კიდევ უფრო ზრდის რისკი.
განვითარებადი ქვეყნების მთავრობები შემოსავლების საშუალოდ 14%-ს ვალების გადახდაზე ხარჯავენ, რაც ათი წლის წინანდელ მაჩვენებელს ორჯერ აღემატება. ამის გამო განათლებისა და ჯანდაცვისთვის ნაკლები თანხა რჩება. IMF-ის ხელმძღვანელ კრისტალინა გეორგიევას თქმით, ამ ქვეყნებში ვალის მოცულობა შემცირდა, თუმცა საერთაშორისო ბაზრებზე სესხის აღება გაძვირდა.
შეხვედრის ბოლოს ქვეყნებს ისევ ბიუჯეტის დეფიციტის შემცირება, ეკონომიკური რეფორმების გაგრძელება და კერძო ინვესტიციების გაზრდა ურჩიეს. ხელოვნური ინტელექტის შესაძლო ეკონომიკური შედეგების შესამცირებლად კი კონკრეტული გეგმა არ წარუდგენიათ.
მსოფლიო ბანკის მონაცემებით, განვითარებადი ქვეყნების ეკონომიკური ზრდა 4.4%-დან დაახლოებით 3.6%-მდე შენელდა, მიუხედავად იმისა, რომ მსოფლიო ეკონომიკამ რეცესია თავიდან აიცილა.
წყარო: Reuters
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
