ინდოეთმა ოქროს უბაჟო იმპორტი შეზღუდა

ინდოეთი, რომელიც მსოფლიოში ოქროს სიდიდით მეორე მომხმარებელია, ძვირფასი ლითონის უბაჟო იმპორტს ზღუდავს. ქვეყნის ხელისუფლებამ საიუველირო ნაწარმის ექსპორტიორებისთვის ოქროს შემოტანის ახალი ლიმიტი დაადგინა, რაც თითოეულ ლიცენზიაზე მაქსიმუმ 100 კილოგრამს შეადგენს. ამ გადაწყვეტილების მთავარი მიზანია საზღვარგარეთიდან ოქროს შესყიდვების მოცულობის შემცირება. ახალი რეგულაციების თანახმად, მწარმოებლებმა ახალი ლიცენზიის მისაღებად წინა საექსპორტო ვალდებულებების მინიმუმ 50% უნდა შეასრულონ. გარდა ამისა, მკაცრდება კონტროლის მექანიზმებიც: პირველადმა განმცხადებლებმა სავალდებულო ფიზიკური ინსპექტირება უნდა გაიარონ, რათა დადასტურდეს მათი საწარმოების რეალური არსებობა და წარმოების სიმძლავრე. ამასთან, უკვე არსებული ლიცენზიის მფლობელებს დაეკისრათ ვალდებულება, ყოველ ორ კვირაში ერთხელ წარადგინონ დამოუკიდებელი აუდიტორის მიერ სერტიფიცირებული ანგარიშები განხორციელებული ოქროს იმპორტ-ექსპორტის შესახებ. ეს ახალი შეზღუდვები ინდოეთის მთავრობის ბოლოდროინდელ გადაწყვეტილებებს მოჰყვა, რომლის მიხედვითაც ოქროსა და ვერცხლზე იმპორტის ტარიფები 6%-დან 15%-მდე გაიზარდა. აღნიშნული ზომების მიზანია, შეამციროს ძვირფასი ლითონების უცხოური შესყიდვები და შეასუსტოს ზეწოლა უცხოური ვალუტის რეზერვებზე, რაც ნავთობის ფასების ზრდით არის გამოწვეული.

წყარო: Investing.com