Intel ახალ სტარტაპს Atom პროცესორის ტექნოლოგიას უზიარებს
Intel ახალ ჩიპების სტარტაპ RosaicLabs-ს Atom პროცესორის ტექნოლოგიის გამოყენების საშუალებას მისცემს. Reuters-ის ცნობით, ეს ამერიკული კომპანიისთვის იშვიათი გადაწყვეტილებაა, რადგან Intel საკუთარი x86 არქიტექტურისა და პროცესორების ტექნიკურ დეტალებს სხვა კომპანიებს, როგორც წესი, არ უზიარებს.
Intel გეგმავს, Rosaic-ს Atom პროცესორის RTL კოდი გადასცეს. RTL კოდი აღწერს, როგორ უნდა მუშაობდეს ჩიპის სხვადასხვა ნაწილი და ინჟინრებს მისი გამოყენებით საკუთარი პროცესორის შექმნა შეუძლიათ. ამგვარად, სტარტაპი Intel-ის ინტელექტუალური საკუთრების მნიშვნელოვან ნაწილს გაეცნობა და მასზე დაყრდნობით საკუთარ დიზაინს შეიმუშავებს.
Atom პროცესორები შედარებით ნაკლებ ელექტროენერგიას მოიხმარს და ნაკლებ სითბოს გამოყოფს, რის გამოც მათ ხშირად მობილურ მოწყობილობებსა და მცირე კომპიუტერულ სისტემებში იყენებენ.
RosaicLabs 2026 წლის მაისში დელავერის შტატში დარეგისტრირდა. კომპანიას ამარჯიტ გილი ხელმძღვანელობს. გილი და Intel-ის აღმასრულებელი დირექტორი ლიპ-ბუ ტანი რამდენიმე ტექნოლოგიურ სტარტაპში ადრეული ინვესტორები იყვნენ. მათ შორის იყო Nuvia, რომელიც მოგვიანებით Qualcomm-მა შეიძინა. გილი ასევე მონაწილეობდა ჩიპების კომპანია Rivos-ის გუნდის შექმნაში, რომლის თავმჯდომარეც იმ პერიოდში ტანი იყო.
Reuters-ის ინფორმაციით, Rosaic-ის დამფუძნებელ გუნდში Rivos-ის ყოფილი თანამშრომლებიც შედიან. დელავერში შეტანილი განახლებული დოკუმენტების მიხედვით, სტარტაპი საწყის ეტაპზე დაახლოებით 10 მილიონი დოლარის დაფინანსების მოზიდვას გეგმავს. Intel-მა გარიგების შესახებ დამატებითი კომენტარის გაკეთებაზე უარი განაცხადა.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
