ირანის ომის ფონზე ნავთობკომპანიები მესამე კვარტალში მკვეთრად გაზრდილ მოგებას ელიან

მსოფლიოს უმსხვილესი ნავთობკომპანიები მესამე კვარტალში უკეთეს ფინანსურ შედეგებს ელიან. ირანის ომის შემდეგ ნავთობპროდუქტების გაძვირებამ კომპანიებს განსაკუთრებით ნავთობის გადამუშავებისა და ვაჭრობისგან მიღებული შემოსავალი გაზარდა.

Shell, BP და TotalEnergies ვარაუდობენ, რომ ნავთობის გადამუშავებიდან მიღებული მოგება გასული წლის ანალოგიურ პერიოდთან შედარებით სამჯერ ან ოთხჯერ მეტი იქნება. Shell-ის გათვლით, ეს მაჩვენებელი ბარელზე რეკორდულ 42 დოლარს მიაღწევს.

TotalEnergies გადამუშავებისა და ქიმიური პროდუქტების ბიზნესიდან დაახლოებით 4 მილიარდ დოლარს ელოდება, რაც წინა კვარტლის მაჩვენებელზე ორჯერ მეტია. ExxonMobil-ის განცხადებით, გადამუშავების უკეთესმა შედეგებმა მისი კვარტალური მოგება შესაძლოა 4.5 მილიარდი დოლარით გაზარდოს.

ახლა ინვესტორებისთვის ერთ-ერთი მთავარი საკითხია, რას გააკეთებენ კომპანიები დამატებითი შემოსავლით. Chevron-მა და ExxonMobil-მა თანხის ნაწილი უკვე ვალის შემცირებისთვის გამოიყენეს.

HSBC-ის ვარაუდით, Shell მეოთხე კვარტალში დაახლოებით 3.5 მილიარდი დოლარის საკუთარ აქციებს შეიძენს. BP კი, სავარაუდოდ, ვალის შემცირებას გააგრძელებს და საკუთარი აქციების შესყიდვის ახალ პროგრამას 2028 წლამდე არ დაიწყებს.

კომპანიები მესამე კვარტლის შედეგებს ოქტომბრის ბოლოს გამოაქვეყნებენ.

წყარო: Reuters