JPMorgan-მა აშშ-ის სტრატეგიულ კომპანიებში $5 მილიარდი დააბანდა

JPMorgan Chase-მა 5 მილიარდი დოლარის ინვესტიცია განახორციელა კომპანიებში, რომლებიც აშშ-ის ეკონომიკისა და ეროვნული უსაფრთხოებისთვის მნიშვნელოვან სფეროებში მუშაობენ. მათ შორისაა ადგილობრივი წარმოება, ენერგეტიკა, თავდაცვითი ტექნოლოგიები და ისეთი პროექტები, რომლებიც ქვეყანას უცხოურ რესურსებზე დამოკიდებულებას ამცირებს.

ბანკმა თანხა, მათ შორის, ახალი თავდაცვითი ტექნოლოგიების, ავტომატიზებული წარმოების, კრიტიკული მინერალებისა და ელექტროენერგიის შენახვის პროექტებში დააბანდა. JPMorgan-ი როგორც ახალ, ისე უკვე განვითარებულ კომპანიებში მონაწილეობს.

ერთი წლის წინ დაწყებული Security and Resiliency Initiative-ის ფარგლებში სხვადასხვა კომპანიასა და პროექტზე დაახლოებით 230 მილიარდი დოლარი უკვე გაიცა. JPMorgan-ის მიზანია, მომდევნო ათი წლის განმავლობაში აშშ-ისთვის მნიშვნელოვან სფეროებში ჯამურად 1.5 ტრილიონი დოლარის ინვესტიციას შეუწყოს ხელი.

მსგავს პროექტებს სხვა ამერიკული ბანკებიც აფინანსებენ. Bank of America 2027 წლის ივლისამდე ციფრულ და ინფრასტრუქტურულ პროექტებზე 250 მილიარდი დოლარის დახარჯვას გეგმავს, Morgan Stanley კი მომდევნო ათწლეულში ტექნოლოგიურ და ინფრასტრუქტურულ პროექტებში დაახლოებით 1.5 ტრილიონი დოლარის ინვესტიციის მხარდაჭერას აპირებს.

წყარო: Reuters