ხელოვნური ინტელექტი ფინანსურ ბაზრებზე რისკებს ზრდის
ხელოვნური ინტელექტი ფინანსურ ბაზრებზე სულ უფრო დიდ როლს იკავებს. Bernstein-ის შეფასებით, ის ვაჭრობას უფრო ეფექტიანს ხდის, თუმცა, ამასთან ერთად, ახალი რისკებიც ჩნდება.
კომპანიებში ხელოვნური ინტელექტი ფინანსურ ანგარიშებსა და სხვა მონაცემებს ადამიანზე გაცილებით სწრაფად ამუშავებს. შედეგად, ინფორმაცია უფრო სწრაფად ვრცელდება, რაც აქციების ფასებზე უფრო სწრაფად აისახება.
ავტომატიზაციის წყალობით ანალიტიკოსებს მეტი კომპანიის შეფასება შეუძლიათ. ამის გამო, ბოლო ერთი წლის განმავლობაში განსაკუთრებით გაიზარდა განვითარებად ბაზრებზე მცირე კაპიტალიზაციის მქონე კომპანიების კვლევა, თუმცა, ანალიტიკოსები ფიქრობენ, რომ ხელოვნური ინტელექტის ფართოდ გავრცელებას თავისი უარყოფითი მხარეც აქვს. თუ ბევრი ინვესტორი ერთსა და იმავე მონაცემებსა და მსგავს ალგორითმებს დაეყრდნობა, მათ მიერ მიღებული გადაწყვეტილებები ერთმანეთს დაემსგავსება. ასეთ დროს, ბაზარზე დაძაბულობის შემთხვევაში, ფასების მკვეთრი ცვლილების ალბათობაც იზრდება. ამის ერთ-ერთ მაგალითად 2024 წლის აგვისტოში იაპონური იენის ბაზარზე განვითარებული მოვლენები შეიძლება განვიხილოთ. ხელოვნური ინტელექტის მიერ შექმნილმა ყალბმა ინფორმაციამ ბაზარზე დროებითი არასტაბილურობა გამოიწვია.
Bernstein ყურადღებას ამახვილებს კიდევ ერთ საფრთხეზეც. საუბარია „უკუკავშირის ეფექტზე“, როდესაც ხელოვნური ინტელექტის რეკომენდაციები ინვესტორების გადაწყვეტილებებზე მოქმედებს, ეს გადაწყვეტილებები კი თავად ბაზრის ფასებს ცვლის. შედეგად, ერთი და იგივე ტენდენცია კიდევ უფრო ძლიერდება.
Bernstein-ის შეფასებით, ხელოვნური ინტელექტი ყოველდღიურ ვაჭრობას უფრო ეფექტიანს ხდის, თუმცა კრიზისულ პერიოდში ბაზრის მკვეთრი რყევებისა და ფინანსური შოკების რისკს ზრდის.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
