კიბერუსაფრთხოების 5 კომპანია, რომლებიც ხელოვნური ინტელექტის ეპოქაში გამოირჩევა

ხელოვნური ინტელექტის სწრაფ განვითარებასთან ერთად კომპანიებისთვის სულ უფრო მნიშვნელოვანი ხდება მონაცემებისა და ციფრული სისტემების დაცვა. ამ ფონზე Morgan Stanley-მა იმ კომპანიების სია გამოაქვეყნა, რომლებიც უსაფრთხოებისა და მონაცემთა დამუშავებისთვის საჭირო ტექნიკური სისტემების მიმართულებით მნიშვნელოვან როლს ასრულებენ. ანალიტიკოსების შეფასებით, ერთ-ერთი მთავარი კომპანიაა Okta, რომელიც მომხმარებლების იდენტიფიცირებისა და სისტემებზე წვდომის მართვის სერვისებს ავითარებს. ამავე სფეროში მუშაობს SailPoint Technologies, რომელმაც ხელოვნური ინტელექტის სისტემების დასაცავად ახალი პლატფორმა შექმნა და ამ პროცესში Anthropic-ის Claude-სთანაც დაიწყო თანამშრომლობა. სიაში მოხვდა Palo Alto Networks-იც, რომელიც კომპიუტერული ქსელებისა და ღრუბლოვანი სისტემების უსაფრთხოებაზე მუშაობს. მასთან ერთად ანალიტიკოსები გამოყოფენ CrowdStrike-საც, რომელიც ასევე ციფრული უსაფრთხოების მიმართულებით საქმიანობს და საკუთარ სისტემებში Claude-ის ტექნოლოგიებს იყენებს. რეიტინგში მოხვდა ასევე Equinix, რომელიც მონაცემთა ცენტრებსა და მაღალი გამოთვლითი რესურსისთვის საჭირო ტექნიკურ გარემოს უზრუნველყოფს. კომპანია იმ სისტემებზე მუშაობს, რომლებიც ხელოვნური ინტელექტის სერვისების მუშაობისთვის არის აუცილებელი. Morgan Stanley-ის შეფასებით, ხელოვნური ინტელექტის ფართოდ გავრცელებასთან ერთად მონაცემთა დაცვისა და ტექნიკური სისტემების უსაფრთხოების მნიშვნელობა კიდევ უფრო გაიზრდება.

წყარო: Investing.com