Lindt-ს აშშ-ში ბავშვთა შრომასთან დაკავშირებული სარჩელი წარუდგინეს
შვეიცარიული შოკოლადის მწარმოებელი Lindt აშშ-ში სასამართლო დავის წინაშე აღმოჩნდა. კომპანიას მომხმარებლების შეცდომაში შეყვანაში ადანაშაულებენ.
სარჩელის ავტორების მტკიცებით, Lindt საჯაროდ აცხადებს, რომ ბავშვთა შრომის აღმოფხვრასა და ადამიანის უფლებების დაცვაზე მუშაობს, თუმცა მისი კაკაოს ნაწილი განასა და კოტ-დ'ივუარში ბავშვთა შრომის გამოყენებით იწარმოება. სარჩელის მიხედვით, კომპანიამ 20 წელზე მეტია იცის, რომ მისი მიწოდების ჯაჭვში ბავშვთა შრომის პრობლემა არსებობს, თუმცა მიუხედავად ამისა, მომხმარებლებს საპირისპირო შთაბეჭდილებას უქმნის. მოსარჩელე მხარე მიიჩნევს, რომ კომპანია ამ პრაქტიკით ეკონომიკურ სარგებელსაც იღებს.
დოკუმენტში აღნიშნულია, რომ Lindt სამომხმარებლო პროდუქციისთვის საჭირო კაკაოს მარცვლებს სრულად განიდან იღებს, ხოლო კაკაოს კარაქის ნაწილს კოტ-დ'ივუარიდან ყიდულობს. ორივე ქვეყანა წლების განმავლობაში ბავშვთა შრომის გამოყენებასთან დაკავშირებული საერთაშორისო კრიტიკის საგანია.
სარჩელი ორგანიზაციამ International Rights Advocates-მა შეიტანა, რომელსაც მსგავსი საქმეები Mars-ის, Mondelez-ისა და Nestlé-ს წინააღმდეგაც აქვს წარმოებული. ორგანიზაციის შეფასებით, მსხვილ შოკოლადის მწარმოებლებს ბავშვთა შრომის წინააღმდეგ არაერთი პოლიტიკა და ვალდებულება აქვთ დეკლარირებული, თუმცა მათი შესრულება პრაქტიკაში ხშირად პრობლემურია.
Lindt ბრალდებებს უარყოფს. კომპანიის განცხადებით, ის ბავშვთა შრომის ნებისმიერ ფორმას გმობს, მომწოდებლებისთვის კი მკაცრი მოთხოვნები აქვს დაწესებული. მოსარჩელე მხარე კომპენსაციას არ ითხოვს. მისი მოთხოვნაა, სასამართლომ კომპანიას მომხმარებლების მიმართ, მათი შეფასებით, შეცდომაში შემყვანი განცხადებების გაკეთება აუკრძალოს.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
