Meta და Reliance ინდოეთში მონაცემთა ცენტრს ააშენებენ
Meta და Reliance Industries ინდოეთში ხელოვნური ინტელექტისთვის საჭირო მონაცემთა ცენტრის შექმნაზე შეთანხმდნენ. პროექტი გუჯარატის შტატში, ჯამნაგარში განხორციელდება.
შეთანხმების მიხედვით, Reliance 168 მეგავატის სიმძლავრის ობიექტს ააშენებს, რომელსაც Meta იჯარით გამოიყენებს. მხარეები მომავალში ცენტრის გაფართოების შესაძლებლობასაც განიხილავენ.
ობიექტი განახლებად ენერგიაზე იმუშავებს. ეს პროექტი წლის დასაწყისში გამოცხადებული 100 მილიონი დოლარის ერთობლივი ინიციატივის გაგრძელებაა, რომლის ფარგლებშიც კომპანიები ინდური ბიზნესებისთვის ხელოვნური ინტელექტის პროდუქტების შექმნას გეგმავენ. ამისთვის ისინი Meta-ს ღია კოდის მქონე Llama მოდელებს გამოიყენებენ.
Meta-სთვის ეს ნაბიჯი გამოთვლითი რესურსების ზრდის გლობალური გეგმის ნაწილია. კომპანია 2026 წელს ამ მიმართულებით 125-დან 145 მილიარდ დოლარამდე ინვესტიციის განხორციელებას გეგმავს.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
