Meta-მ ინდოეთში მავნე პროგრამებთან დაკავშირებული ათობით რეკლამა წაშალა

Meta Platforms-მა ორშაბათს ათობით რეკლამა წაშალა, მას შემდეგ, რაც ინდოეთის ხელისუფლებამ Facebook-სა და Instagram-ზე გამოავლინა რეკლამების სქემა, რომელიც მომხმარებლებს სექსუალური შინაარსით იზიდავდა და მავნე პროგრამების ჩამოტვირთვისკენ უბიძგებდა.

ინდოეთის მთავრობის განცხადებით, ასეთი რეკლამები მომხმარებლებს ფიშინგის ვებსაიტებზე გადაჰყავდა და სთავაზობდა Android აპლიკაციებს, რომლებიც პორნოგრაფიულ აპებად იყო შენიღბული. მათი მიზანი მომხმარებლების საბანკო მონაცემების მოპარვა და საბანკო ანგარიშებიდან თანხის გადარიცხვა იყო.

ხელისუფლებამ აღნიშნა, რომ Facebook-სა და Instagram-ზე მოქმედი რეკლამები, მათ შორის „Night Play“ და „Kyss“ სახელებით, მომხმარებლებს მსგავსი საიტებისკენ მიმართავდა.

Reuters-მა მთავრობის გაფრთხილების გავრცელების შემდეგ მინიმუმ 39 ასეთი რეკლამა კვლავ აქტიური აღმოაჩინა. ბევრი მათგანი მომხმარებლების ყურადღების მისაქცევად სექსუალური შინაარსის ვიდეოების მინიატურებს იყენებდა. მას შემდეგ, რაც Reuters-მა რეკლამების შესახებ Meta-ს აცნობა, კომპანიამ ისინი მალევე წაშალა.

Meta-ს აღნიშნულ საკითხზე Reuters-ის კითხვებისთვის პასუხი არ გაუცია.

Meta-ს სარეკლამო წესები კრძალავს რეკლამებში ზრდასრულთა სიშიშვლესა და სექსუალურ აქტივობას, ასევე თაღლითური ან მომხმარებლის შეცდომაში შემყვანი პრაქტიკის გამოყენებას.

ინდოეთში კიბერთაღლითობის პრობლემა განსაკუთრებით მწვავეა. მთავრობის მონაცემებით, ქვეყანაში 2025 წელს კიბერთაღლითობებით გამოწვეულმა ზარალმა თითქმის $2.4 მილიარდს მიაღწია, რასაც ხელს უწყობს ციფრული გადახდების სწრაფი ზრდა.

Reuters-ის ინფორმაციით, ეს უკვე მეორე შემთხვევაა ბოლო რამდენიმე კვირაში, როდესაც ინდოეთის ხელისუფლებამ მსხვილ ტექნოლოგიურ პლატფორმაზე ფინანსურ თაღლითობასთან დაკავშირებული პრობლემები გამოავლინა. მანამდე ხელისუფლებამ Google-ს Firebase პლატფორმიდან ასობით ანგარიშის დახურვა მოსთხოვა, რადგან თაღლითები მათ მსხვილი ბანკების სახელით მომხმარებლების მოსატყუებლად იყენებდნენ.

ერთ-ერთი რეკლამა მომხმარებელს ვიდეოაპლიკაციის ვებსაიტზე გადაიყვანდა, რომელიც ასობით პორნოგრაფიულ ვიდეოს სთავაზობდა. კონტენტზე წვდომისთვის მომხმარებელს ოფიციალური აპლიკაციების მაღაზიის გვერდის ავლით „Movexa.apk“ ფაილის ჩამოტვირთვა მოეთხოვებოდა.

ინდოეთის მთავრობის გაფრთხილების თანახმად, ასეთ აპლიკაციებს შეეძლოთ ტელეფონში შენახულ ინფორმაციაზე ფარული წვდომა, ერთჯერადი პაროლებისა (OTP) და საბანკო PIN-კოდების მოპოვება, ასევე მომხმარებლის ცოდნის გარეშე საბანკო ანგარიშებიდან თანხის გადარიცხვა.